Tornâts te jentrade, de prime puarte a çampe dal porton si jentre te Sale da la steme Antonini, che e cjape non dal simbul de famee.

 La steme, dividude di une fasse di arint in doi cjamps blu e ros, e je piturade suntun ricuadri dal sofit che al ten sù il caminet de sale parsore.

 Ancje la decorazion des parêts e va indaûr al Sîscent: e rapresente une procession di cjavaluts di mâr, dolfins e fantacins, alternâts di pergamenis e cameos in vert, che a rapresentin lis cuatri stagjons.