Gjeografie

 

Delimitazion teritoriâl

 Il Friûl al fâs part dal Stât talian dal 1866 cu la sô part ocidentâl (i teritoris di Udin e Pordenon) e dal 1919 cu la part orientâl (il Gurizan). Vuê, cun di plui, il Friûl al è cjapât dentri te regjon autonome Friûl Vignesie Julie, la plui orientâl di chês de Italie dal nord (proviodude de Costituzion de Republiche Taliane fin dal 1947 ma istituide dome intal 1963) insiemit cul piçul teritori di Triest.

 Par Friûl si intint l’insiemi des trê provinciis storichis di Udin, Gurize e Pordenon, (par une estension totâl di 7.633 kmc.) ancje se lis popolazions insediadis intai ôrs dai teritoris de provincie gurizane e di chê pordenonese no si sintin furlanis e la lôr inflession linguistiche, prime espression de identitât culturâl, a ‘nt testemonee la parziâl diviersitât. Dentri de stesse provincie di Udin po, e in particolâr mût sui confins, a son stanziadis popolazions di lenghe todescje, sclave e venite, che cul mont furlan no àn someance culturâl se no chê, altamentri civîl, de pacifiche convivence. Si à di ricuardâ daspò, che fintremai fûr dal confin de atuâl regjon autonome e in particolâr intal teritori belumat di Sapade, agregât al Cjadovri intal 1853 (ma che al fâs part inmò vuê de diocesi di Udin) e intal mandament di Puart (za agregât intal 1838 a Vignesie dal guvier austriac, ma che al fâs part inmò de diocesi di Concuardie-Pordenon) a vivin popolazions che si sintin e si declarin furlanis a ducj i efiets e dulà che si regjistrin moviments di opinion par tornâ inte “Patrie” furlane.

 No je invezit storicamentri furlane la cuadrilengâl Val Cjanâl (Kanaltal, Kanalska Dolina), ven a stai la Val dal Fele a nord di Pontêbe, che a est de siele di Cjamparòs, ancje sot dal profîl gjeografic, e je za inte rive carinziane. Duncje si pues intindi par “regjon furlane” chê cjapade dentri dai confins gjeografics atuâi des provinciis di Udin, Gurize e Pordenon, delimitadis dai confins naturâi de Livence a ocident e dal Timau a soreli jevât e comprendude tra la cjadene des Alps a nord e il Mâr Adriatic a sud. Il Friûl duncje, al cjape dentri plui dal 90% de regjon aministrative dal Friûl Vignesie Julie.

Pagina aggiornata il 31.05.2016