Il Cine Furlan

Il cine furlan al nas sul principi dai agns Otante. Il prin film di finzion par furlan al è Maria Zef di Vittorio Cottafavi che al ven produsût de sede RAI pal Friûl-Vignesie Julie tal 1981.

Il cine, gjavât fûr dal romanç omonim di Paola Drigo scrit tal 1936, al conte la storie di une fantate cjargnele che par parâsi, ma soredut par difindi la sûr piçule des voiis dal barbe, e finìs che lu cope. Tal meti dongje il film al à vût une funzion di fonde il scritôr Siro Angeli, perfet come atôr protagonist e senegjatôr.
Tra i prins autôrs a rindisi cont de impuartance de lenghe tant che element di fonde de identitât di un popul, bisugne nomenâ Marcello De Stefano che jenfri il 1981 e il 1984, al zire Grafiz ’tun orizont su la figure dal beât Luigi Scrosoppi, la prime opare di stamp religjôs dal nestri cine. Plui indenant, tal 1986, al decît di fâ une version furlane de trilogjie Controlettura-Una linfa che scorre-Uomo, macchina, uomo che e deventarà Cuintrileture part prime, seconde e tierce, la sô opare plui impuartante sul sens e sui valôrs di une etnie. Il cine di De Stefano al è particolâr, a mieze strade tra un documentari e un film di finzion, intun gjenar che lui al clame “film-saç”. In Cuintrileture part prime si viodin trê zovinis turistis che a visitin il Friûl. In gracie dai monuments, des oparis artistichis e dai documents che lis trê protagonistis a scuvierzin, il regjist al propon une sorte di cuintrileture de storie e de art dal Friûl, une maniere gnove di viodi la realtât, là che al marche la specificitât dal popul furlan e de sô lenghe. Inte seconde part, al documente i lavôrs par tornâ a fâ sù e par slargjâ l'acuedot tes zonis taramotadis e tes valadis dal Nadison. Cun chês imagjins, al pee il passât cul presint, la tradizion cu la tecnologjie e al met in evidence la storie di un popul che no si rint denant des disgraciis. Inte tierce part il regjist al tamese lis ativitâts artesanis, il lôr rapuart cul mont contadin e la continuitât che a àn mantignût, ancje dentri de societât moderne. 

Dut câs, il cine furlan al è rivât tart su la sene culturâl e la cause si à di cirîle tal fat che il cine al è une art “industriâl”, che e à bisugne di mieçs economics impuartants. Se e je vere che za tal 1927 Chino Ermacora al veve zirât La sentinella della patria e fin dai agns Trente alc al jere saltât fûr, si veve simpri a ce fâ cun films par talian. La reson di cheste sielte, cun dute probabilitât, e je leade ae forma mentis di in chê volte ma ancje a chê idee – che e je vive ancje in dì di vuê – che la lenghe furlane e sarès un pidiment che no permet di lâ plui innà dai nestris confins.
Simpri par chel che al inten la produzion par talian, dongje di La sentinella della patria, l'unic esempli di cine fat cun mieçs professionâi al è Gli ultimi di Vito Pandolfi, zirât tal 1962 e restaurât di pôc par cure de Cineteca del Friuli, di Cinemazero e dal CEC. I promotôrs di cheste operazion a àn ancje pensât di meti adun un dvd cui sottitui par furlan.

Il 1988 al è, dal sigûr, un moment impuartant pal svilupâsi dal nestri cine. Juste ta chel an, pensade e inmaneade dal CEC di Udin, e nas la Mostre dal Cine Furlan, un festival bienâl, competitîf, par films in lenghe furlane che di subit al è stât un suces. Te seconde edizion dal festival (1991) al vinç un curtmetraç di Lauro Pittini intitulât I varès volût vivi. Il film al conte une storie vere: il drame di un emigrât che al torne a cjase daspò vê lavorât par agns in miniere. Aromai vieri e malât di silicosi, il protagonist al resone sul sens de vite e sul parcè di tant patî.
Si à di ricuardâ ancje un altri film interessant, presentât ta chê stesse edizion, Cjossul di Michele De Mattio, un curtmetraç che al piture la storie di un personaç particolâr. Simpri tal ’91, si puedin viodi doi lavôrs di ricercje stilistiche e formâl rude, ven a stâi Rivoluzion planetarie di Paolo Cantarutti e L’omp di Daniela Toneatto.
Tal 1993 Lauro Pittini al presente il luncmetraç Prime di sere, un film gjavât fûr dal romanç omonim di Carlo Sgorlon. Chest cine al è il struc di dut il lavôr di Pittini: un cine che al jentre intai personaçs par scrusignâ la lôr psicologjie, un cine che si interoghe sui dramis umans e sul sens de vite. Tal 1994, Benedetto Parisi al presente Dopli funerâl, conte popolâr, là che i dissens di Laura Feruglio a compagnin la storie contade de vôs di une viele di Preon. Parisi al veve tacât a meti in forme di film flabis e liendis za dal 1988, cuant che al veve presentât intal festival di Udin Cui isal content in chist mont? che al veve vinçût il prin premi.
Giancarlo Zannier tal 1995 al zire Benandants, un dai pôcs luncmetraçs dal nestri cine. Par meti adun chest film su la figure dai benandants, il regjist al dopre stîi e nivei di leture diviers: chel realistic par meti in sene i procès de incuisizion daûr dai documents storics, e chel fantastic par mostrâ i “viaçs” in spirt che i benandants a fasevin par combati cuintri dai strions.
Al rimonte invezit al 1991 il prin esperiment di video didatiche, val a dî Videoscais, une racuelte di episodis che a àn tant che protagoniscj i membris di une famee. Il video al nas inte suaze di un progjet di educazion bilengâl talian-furlan puartât indenant de Universitât dal Friûl. Doi agns plui tart, te stesse suaze, Renato Calligaro al zire Lis striis di Gjermanie, un video gjavât fûr de conte omonime di Catarine Percude. A passin ancjemò doi agns e Giuseppe Bevilacqua e Mara Udina a zirin Linea dreta, linias dretas gjavât fûr di une conte dal poete Leonardo Zanier che, ta cheste «fantasie ator di une storiute cjargnele», al interprete se stes.
Par chel che al inten i documentaris o podìn dî che il cine furlan al nas di cheste fate, pensìn dome a La sentinella della patria (1927). Ancje plui indenant la produzion documentaristiche e varà pardabon une part impuartante. Tal 1996 Marco Rossitti al zire Il liutâr, un agrât poetic a cheste profession nobile. Dut câs, za tal 1988, Antonio Magliocchetti al veve fat Jo o soi stade dome une volte al cine, un film-interviste. Tal 1999 po dopo Carlo Della Vedova e Luca Peresson a esplorin la realtât de comunitât furlane di Colonia Caroya (Argjentine) cun Farcadice. Tal stes an Benedetto Parisi al piture la umanitât di un personaç fûr dal ordenari, l’artist di strade Tony Zavatta, in Tony. Il stes autôr al zire, tal 2001, Gnovis dal Brasîl su la figure e su lis sieltis di vite di un missionari furlan. O ricuardìn ancje La fontana di Bosplans di Michele Marcolini e Vuere dome di ricuarts di Gianni Fachin.
Un discors par lôr cont a meretaressin i lavôrs di Remigio Romano che, par mieç de imagjin filmade, al torne a proponi un mont che nol è plui come in Une zornade a seselâ e in Il purcit. Tal 1997 Massimo Garlatti-Costa al zire Il piligrin, un lavôr a mieze strade tra sperimentazion, provocazion e divertiment. Tal 2001 Garlatti al fâs il so lavôr plui complet, une comedie che al à ancje un sucès di public straordenari tune sale comerciâl, Buris, libars di scugnî vignî. Dal stes regjist si segnale ancje il documentari storic Friûl, viaç te storie (2004) realizât de Provincie di Udin pe promozion de storie furlane.

Sul prin jentrâ dal tierç mileni si vierç une stagjon gnove pal cine furlan, un cine che si sint aromai libar di lâ plui innà di une vision dome locâl par rapresentâ lis situazions e i gjenars i plui diviers. Tal 1999, Lorenzo Bianchini al zire I dincj de lune, prin horror par furlan. Il film, intun stîl che al deventarà la marcje dal autôr, al met adun aspiets e ambientazions carateristics dal lûc cun elements tipics dal cine dal orôr classic. Tal 2001 Bianchini al da fûr Lidrîs cuadrade di trê, un luncmetraç li che i protagoniscj a son trê students di un istitût superiôr. In chest gnûf contest e reste dut câs la sensazion che l'ûs de lenghe al resti peât dispès a di une concezion strumentâl, val a dî che la lenghe e sei doprade plui cun chê di ‘jessi fedêi a di une cierte realtât’ che no come codiç di comunicazion.

Dut câs, i agns jenfri il 1999 e il 2001 a son un moment avonde fûr dal ordenari pe nestre produzion cinematografiche sei sul plan cuantitatîf, sei su chel cualitatîf. Di là dai za nomenâts, si ricuarde La muart cui çucui di Giorgio Milocco e Andrea Nardon (1999), un film che, zuiant suntun torgul blanc e neri, al da fûr une fuarce espressive straordenarie. Tal 2001, il regjist Manlio Roseano al zire un film gjavât fûr di un romanç di Sergio Cecotti, Il tierç lion: un cine di investigazion che al à dentri elements di stamp esoteric. La edizion de Mostre dal 2003 e da il prin premi pe sezion dedicade ai documentaris e ai curts a Pacific di Mauro Tonini; te sezion films di finzion e premie il luncmetraç di Remigio Romano Âstu mai pensât di sposâti... in Comun?, une parodie dai Promessi sposi ambientade in dì di vuê; te sezion dedicade aes oparis par fruts e segnale il film di Liviana Calabrò La roie di Cussignà e ta chê dai curtmetraçs Lûs distudadis di Nicola Fraccalaglio e Thomas Marcuzzi e Cuatri cjantons par une ‘francje’ di Carlo Damasco, une storie scrite di Giovanna Zorzenon e premiade al Concors par Tescj Cinematografics dal 2002. Il Concors al è une altre manifestazion inmaneade dal CEC a pro dal cine furlan e si davuelç un an sì e un no, alternantsi cu la Mostre. La iniziative e nas intal 1996 tant che concors par senegjaturis, tal 2002 si slargje e e devente concors par tescj cinematografics.
In ultin, no si pues fâ di mancul di ricuardâ il film di Christiane Rorato Vuerîrs de gnot, su lis olmis dai Benandants, presentât tal Cine di Essai di Udin ae fin dal 2003. Il documentari al è une ricercje su ce che al è restât in dì di vuê dai benandants e, plui in gjenerâl, su lis tradizions che a son restadis ancjemò vivis tal Friûl di vuê. Il film al è jessût in trê versions: furlane, taliane e francese.
 

 

Pagina aggiornata il 31.05.2016