Il Teatri Furlan

Il teatri, come forme di art che e rapresente la vite intes sôs diviersitâts comichis e dramatichis, al comparì in Friûl intal ‘800, duncje une vore tart se si pense che la lenghe furlane e à une origjin plui antighe di cirche 1000 agns.

In dute Europe za dal X secul a vignivin rapresentâts dramis liturgjics ispirâts ai Vanzelis che a jerin davuelts dilunc lis grandis fiestis cristianis. In Friûl la fuarte presince de glesie di Aquilee e à lassât une vore di testemoneancis di chestis liturgjiis ancje se in realtât chês a rivuardavin plui la storie de musiche che chê dal teatri. Po dopo il drame liturgjic si trasferì fûr des glesiis par rivâ a un public plui grant ma, stant che il popul nol fevelave il latin, si scomençà a meti dentri lis peraulis des feveladis locâls, fasint nassi cussì chel che dopo al sarà il teatri intes variis lenghis.

Spostant il lûc di rapresentazion fûr de glesie si bandonà ben planc l’argoment sacri e il spetacul si trasformà in parodie comiche de vite par diviertiment, insiorantsi cun interpretazions intes lenghis volgârs.

In tal XV secul si svilupà la Comedie de art che e de vite a lis primis veris compagniis teatrâls,  cuntun lengaç simpri di plui locâl e regjonâl. Il Friûl però nol vivè cheste evoluzion, ancje par vie de colade dal Stât patriarcjâl intal 1420: lis lotis pe spartizion tra Vignesie e Austrie, la presince puare de Comedie de art e la mancjance si spaziis pai spetacui a segnarin la vite culturâl de epoche, blocant cussì la creazion di une scuele e di une tradizion teatrâl furlane.

Tra il XVI e XVIII secul cualchi leterât furlan al provà la scriture teatrâl ma di lôr o cognossin dome i nons o i titui di cualchi comedie; i plui nomenâts a son Vincenzo Giusti, Pietro Diana, Troilo Savorgnan, Enrico Altan il Vecjo, Girolamo Ludovicis, Francesco Stella, Enrico Altan il Zovin, Ciro di Pers e Ermes di Colorêt. Ma la vere nassite de scriture teatrâl furlane e je dal XIX secul cun Pieri Çorut (Pietro Zorutti) che al scrivè un test par furlan e che intal 1847 al publicà Il Trovatore Antonio Tamburo, une novitât pe dramaturgjie furlane. Intal ‘800 altris scritôrs a provarin cu la poesie e la scriture pal teatri: o ricuardìn Pacifico Valussi, Francesco Leitenburg, Giuseppe Edgardo Lazzerini, Francesco Nascimbeni e Caterine Percude. 

Ae fin dal secul la produzion di scriture pes senis e deventà une vore grande, ancje se cun sogjets sempliçs, tramis moralistichis e legris che a mostravin la trancuile vite furlane di ogni dì.

Intal 1919 e nasseve a Gurize la Societât Filologjiche Furlane, sensibile ae difese e a la  promozion de lenghe, de culture e des tradizions dal Friûl, e ste atente ancje al teatri, tignintlu di cont come strument di disvilup e difusion de lenghe furlane.

I autôrs dal prin Nûfcent si fasevin condizionâ de semplicitât di vite che a vevin tor ator, no cirivin une creativitât leterarie lôr ma si limitavin a meti jù tramis facilis, buinis di rispietâ il costum e coretis dal pont di viste sociâl, peant cussì l’ûs de lenghe furlane dome intes comediis legris o patetichis. Dopo dut no jere une tradizion leterarie di riferiment: i inteletuâi a tignivin il teatri par une forme artistiche minôr, e la lenghe furlane che no fos in stât di pandi concets alts ma che e fos buine dome par un ûs folcloric e disimpegnât.

La metât dai agns Cuarante e viodè la presince in Friûl di Pier Paolo Pasolini, grant om di culture che al à condizionât une vore la poesie ma no tant la scriture teatrâl par furlan; so il test dramatic I Turcs tal Friûl, restât però isolât.

No cate la riprese dal dopovuere la culture e il teatri furlan a faserin fadie a seguî i pas dal cambiament, restant peâts ai schemis dai agns prime. I autôrs a vevin cussì di fâ i conts cuntune realtât fate di piçulis compagniis teatrâls che si esibivin plui par divertiment che par motîfs artistics o culturâi. Dome pôcs di lôr, come Renato Appi, Alviero Negro, Aurelio Cantoni e Luigi Candoni a rivarin a lâ oltri il teatri fat di tramis popolârs e contadinis e svicinantsi ai lengaçs naratîfs modernis.

I agns Otante e Novante a segnarin une cressite de ativitât teatrâl furlane cu la costituzion di gnovis compagniis amatoriâls e gnûfs autôrs, ancje se e restà leade a formis e contignûts des origjins.

Intal 1987 e nassè a Udin la Associazion teatrâl furlane cul fin di promovi e coordinâ la ativitât des tantis compagniis amatoriâls in regjon, organizant ancje un concors leterari par gnûfs tescj teatrâls, che al à fat scuvierzi scritôrs come Gianni Gregoricchio, Giovanni Morsan, Alberto Luchini, Roberto Ongaro, Paolo Sartori e Carlo Tolazzi. No cate chest però il teatri furlan al continuave a jessi plui un fatôr ricreatîf che une ativitât culturâl e no considerave la lenghe furlane un mieç di disvilup sociâl e artistic.

I agns Otante però a vioderin ancje la nassude di formazions teatrâls e compagniis professionistichis come il Teatro Incerto, formât di Claudio Moretti, Fabiano Fantini e Elvio Scruzzi, che inmò in dì di vuê a metin in sene tescj di alte comicitât di lôr produzion.

Intal 1988 a Udin e vignè costituide la Civiche academie di art dramatiche “Nico Pepe” che si ocupe di formazion intes variis dissiplinis dal spetacul e di organizâ cors di recitazion e leterature furlane. Intal 1996 un grop di atôrs a costituirin la compagnie Academia de Gli Sventati proponint un teatri di mascare e de comedie di art su tescj scrits di lôr sedi par talian sedi par furlan. Su scuen nomenâ ancje Elio Bartolini, scritôr e senegjatôr famôs in dut il mont, che cun Paolo Patui al à scrit Bigatis, preseade opare teatrâl che e lee la peraule cul cjant e la musiche.

Vuê il teatri furlan al sta cjapant dôs stradis diviersis: di une bande si sta inviant viers un professionisim reâl par deventâ un strument di cressite artistiche e sociâl; di chê altre si concretize ancje cu la presince simpri plui fuarte di compagniis di teatri amatoriâl leadis ae tradizion.

Pagina aggiornata il 31.05.2016