La musiche

Intune tiere di grandis contaminazions culturâls come il Friûl no podeve no jessi une propueste musicâl tant siore e svariade, dulà che ancjemò vuê si pues cjatâ lis olmis arcaichis di un passât contadin e de sô tradizion orâl dongje di une sperimentazion artistiche musicâl rude che e fâs des sôs lidrîs culturâls un element dispès indispensabil.

L’univiers de musiche strumentâl furlane al è une vore complès e tradizionalmentri al esist dome in forme di acompagnament pal bal cuntune grande varietât di repertoris. Lis formazions a son fatis par solit di violin (o clarinet), liron, ghitare o, plui dispès, de armoniche. Ancje in Friûl però, come in altris regjons dal stât talian, il cambiament dai costums e la introduzion di gnûfs gjenars a àn causât che si bandonàs in mût progressîf struments, formazions e repertoris popolârs tipics de tradizion che prime a jerin numerôs, soredut intai cjants orâi pes gnocis, intal grant repertori di ninenanis, filastrocjis, nainis e plui in gjenerâl, di cjantis par frutins e chei rituâi peâts al calendari (Nadâl, Prin dal an, Epifanie, Carnevâl, Vierte, Setemane Sante). Dut câs il cjant tradizionâl furlan plui carateristic al è di sigûr la vilote, une vore antîc, formât di plui vôs (polifonic) e che al dopre in maniere esclusive il mût maiôr. Intes ultimis desenis di agns si è une vore rinfuarcide la ativitât di cetantis formazions corâls che a àn recuperât e tornât a proponi ariis tradizionâls furlanis. Un cjapitul specific al larès dedicât al cjant liturgjic di tradizion orâl che in Friûl al vante repertoris e modui espressîfs riferîts al cjant patriarcjin che inmò in dì di vuê al sorevîf in ciertis localitâts furlanis tant che Davâr, Çurçuvint e Maran.

Intal secont dopovuere, cu la difusion di radio, television e dal marcjât discografic, si son imponûts ancje in Friûl modei musicâi lontans des caraterizazions storichis des culturis musicâls locâls come la ‘cjançon melodiche ae taliane’, fate ancje in lenghe furlane soredut cun musiciscj e cjantants come Beppino Lodolo.

De metât dai agns Setante un gnûf fenomen al à traviersât la culture musicâl furlane causant la nassite di un vêr e propri marcjât musicâl locâl. Fra ducj e su ducj si à di segnalâ la figure di Dario Zampa sostignidôr di une cjançon di autôr dute furlane, o il fenomen dal revival folk, o ben une rileture de ‘musiche di lidrîs’. In chescj agns a nassin ancje des manifestazion difarentis, come il Folkest di Sant Denêl che al è ancjemò in dì di vuê une des manifestazion di chest gjenar plui grandis e di tradizion plui siore in Europe. Scomençant duncje cu la riscuvierte des tradizions al è nassût pardabon un moviment musicâl siôr di gnûfs progjets, sperimentazions, contaminazions. In chest contest autôrs ispirâts ae cjançon politiche (Canzoniere di Aiello, Canzoniere Friulano, Povolâr Ensemble) a scomencin a madressi un interes sincîr pe musiche popolâr, creant une vere e proprie “scuele”.

I agns Novante a son fondamentâi pe cressite di une gjenerazion di musiciscj e di public: il za nomenât Folkest, Radio Onde Furlane cul so concors Premi Friûl, il Folk club di Buri e il Centri sociâl autogjestît di Udin; al nas duncje un moviment plen di scambis tra la musiche etniche, il jazz, la contemporanie, la regjon e je un laboratori in plene vore, tant che si fevele di Gnove musiche furlane come di un vêr gnûf gjenar. No cate dute cheste ferbinte ativitât però, il marcjât nol premie dutis chestis produzions e tancj artiscj che a àn provât il salt fûr de regjon a son restâts il plui des voltis a mieze strade, cence une afermazion clare in altris marcjâts, colpe forsit ancje de mancjance di une politiche culturâl precise intal setôr.

 

Par chel che al rivuarde la musiche di autôr tancj a son i nons di cantautôrs furlans: Lino Straulino, che al à prodot un repertori consistent acustic e vocâl, Loris Vescovo, Aldo Giavitto, Renzo Stefanutti, Stefano Fedele, Ennio Zampa, Silvia Michelotti e Fabian Riz; une menzon particolâr e va al grup dai Mitili FLK, che a sunin un gjenar etnorock contaminât e viert ma distes indreçât a meti in prin plan i valôrs di une lenghe e di une culture minoritarie. A Gurize si segnalin i Zuf de Zur, contaminazion dal gjenar tradizionâl-zingar-klezmer intes lenghis feveladis storicamentri inte citât: furlan, sloven, todesc e istrosloven. Intal Friûl ocidentâl a operin i Braul, cuntun elegant neofolk, invezit in provincie di Udin i No Si Sa, partidants di un rock classic, e i Bakan cul lôr folk rock di strade. Altris menzions a van al violinist Giulio Venier e ai grups Fûrclap e Strepiz.

Il marcjât discografic invezit al funzione ben par une altre tradizion musicâl furlane: la parodie; chê storiche di Toni Merlot, chê sbrenade di Quella sporca mezza dozzina, fin a chê rafinade dai Beat Lès, gustose rivisitazion dai Beatles par furlan.

Intai agns Otante il Friûl al è stât un pont nevralgjic pal disvilup dal punk/new wave, grazie ancje a la ativitât dal Centri sociâl autogjestît di Udin, ae rassegne Festintenda di Mortean e ae ativitât di Radio Onde Furlane, sensibile ae difusion di chest gjenar. A son cussì nassûts grups atents ae potenzialitât di une lenghe come il furlan intai gjenars come l’hip hop (DLH Posse), hardcore (Inzirli), thecno (Madrac), pop (Prorastar), crossover (Pantan), blues acit (Croz Sclizzaz), grunge (Jonokognos), e i grups che a àn vût plui suces come i Arbe Garbe e Kosovni Odpadki, che a àn sunât e publicât une vore fûr regjon. Un altri contribût impuartant ae musiche furlane al è dât de musiche jazz che si ispire ae tradizion popolâr intun contest di ricercje tra improvisazion e musiche contemporanie, moviment siôr di interscambis cun altris gjenars: rock, etniche, cjançon d’autôr, contemporanie. Si segnalin produzions come L’insium di Glauco Venier, che al rielabore cun intensitât emotive il paesaç sonôr furlan, lis interpretazions cui flâts e l’orghin liturgjic di Daniele D’Agaro e Mauro Costantini in Discantus e l’omaç di UT Gandhi aes vilotis dal composidôr Zuan Lenuzza in Cjale ce sere. Tal ultin, intal 2000 e nas la esperience de Phophonix Orchestra che e ripropon improvisazion di alt nivel e che e je ancje associzion culturâl ative intal cjamp progjetuâl.

Pagina aggiornata il 31.05.2016