Il Nûfcent

Jenfri i doi secui, une serie di rivistis che a metin dongje contribûts preziôs su lenghe, culture e tradizions popolârs a deventin imprescj utii ae ricercje e ae elaborazion di ideis e sfuarçs comuns. Finide la stagjon des Pagine friulane vignudis fûr a Udin li di Domenico Del Bianco (1888-1907), a nassin a Gurize Le nuove pagine, diretis di Giovanni Lorenzoni (sîs fassicui tacant dal 1907) che a lassin il puest a Forum Iulii (1910-1914) che e pues contâ sul contribût di Ugo Pellis.

Prime e vie pe Vuere Grande, Gurize e manifeste in graciis di chestis iniziativis e dai siei promotôrs la sô furlanetât, e al è li che tal 1919 e nas la Societât Filologjiche Furlane, trasferide a Udin cualchi timp dopo, che e racuei i risultâts dai disvilups dal Votcent, prospetant cambiaments intun spirt di continuitât sostanziâl. La leterature furlane, invezit, e jere daûr a voltâ pagjine, e la trasformazion e sarès rivade pluitost intun spirt di contraposizion.

Tal 1942, an che al segnave i 150 agns de nassite di Pieri Zorut, dôs vôs in particolâr a mostrin di no volê cjapâ part aes celebrazions gjenerâls. A son chês di Pier Paolo Pasolini e Josef Marchet. In gracie di Pasolini (fi di mari furlane, origjinarie di Cjasarse) e ae publicazion propit tal 1942 a Bologne de racuelte Poesie a Casarsa, il furlan si imponarà pe prime volte, fûr dai confins de regjon, tant che lenghe pe poesie e strument leterari complet e moderni. Tal 1945 al fonde la Academiuta di lenga furlana e, a tacâ dal 1944, al fâs stampâ une serie di rivistis (cuatri Stroligut e il Quaderno romanzo dal 1947) dulà che e cjape cuarp un pôc par volte une vere scriture moderne. Pasolini al mostre amirazion par i poetis Franco de Gironcoli e Riccardo Castellani.

La ereditât di Pasolini e je cjapade sù, se pûr intun mût diferent, ancje dal grup di Risultive, nassût tal 1949 daûr de iniziative di Josef Marchet e che al cjapave dentri autôrs come Dino Virgili, che al à scrit il romanç L’aghe dapît la cleve, Otmar Muzzolini e Lelo Cjanton.

Marchet e Pasolini a condividin il sfuarç di slargjâ i spazis dal furlan, di dâi une dignitât complete tant che lenghe. Par Pasolini chest al è pussibil traviers de poesie, te libertât de creazion individuâl. Par Marchet invezit al covente un model unitari, che al vedi valôr sei pe comunicazion sociâl, come par esempli tes pagjinis de riviste La Patrie dal Friûl, sei pe produzion leterarie.

Tal 1949 al jes Il Tesaur, riviste direte di Gianfranco D’Aronco. Tal 1952 e nas Scuele libare furlane, par iniziative di Domenico Zannier.

No pues jessi assimilade a une scuele, ancje se e comparìs tal prin numar di Risultive, la scritore Novella Cantarutti. Dongje a Marchetti come ancje a Pasolini, la sô scriture e va daûr di trois siei personâi, sei par sielte de varietât di Navarons, sei pe libertât de espression, che e va de poesie ae conte ae ricercje etnografiche, che la Cantarutti e puarte indevant cun passion dongje de ativitât leterarie.

Intai agns Sessante si vierç une stagjon gnove de leterature furlane. Tal 1964 al jes Libers... di scugnî lâ, prime prove poetiche di Leonardo Zanier, che al denuncie la feride grande de emigrazion. Dal 1968 al è invezit Salustri, di Umberto Valentinis.

Il taramot dal 1976 e il desideri di tornâ a scuvierzi lis lidrîs, al prodûs une cuantitât di iniziativis e di produzions leterariis, cuntune vore di autôrs che a tachin o che a tornin a scrivi par furlan (Amedeo Giacomini, Elio Bartolini e Siro). Gianni Nazzi, tra lis tantis iniziativis pe Clape Culturâl Aquilee, al cure une golaine di classics des leteraturis forestis che e rispuint al obietîf di dâ al furlan une dignitât complete di lenghe.

Il grup di Sot/Sora che si da adun te biblioteche di Montreâl, dulà che a cjatin espression (ma le puartaran indevant, po dopo, ancje di bessôi) Rosanna Paroni Bertoja, Federico Tavan, Antonio De Biasio. Origjinari di Montreâl, ma lât a stâ a Milan, al è ancje Beno Fignon. Si pues fâ i nons, sotliniant dut câs lis individualitâts diferentis, di Elsa Buiese, Celso Macor, Lionello Fioretti, Giacomo Vit, Francesco Indrigo, Nelvia Di Monte e Giorgio Ferigo e, par finî, pûr te lôr esperience divierse, chel di dôs vôs che si corispuindin te fuarce di inovazion: Ida Vallerugo e Pierluigi Cappello.

Pagina aggiornata il 31.05.2016