Il Sîscent baroc e il Sietcent

Il Sîscent al è il secul des academiis e dal baroc. A Udin, la preference di chest secul pes societâts leterariis si manifeste in particolâr te Briade udinese, un sodalizi poetic dulà che i socis (trê nodârs, un pitôr, un magjistrât, doi predis, un avocat) si dan curiôs sorenons: Lambin (Girolamo Missio), Mitit (Brunello Brunelleschi), Nator (Daniello Sforza), Ritit (Giovanni Pietro Fabiaro), Ritur (Francesco di Cucagna), Rumtot (Gasparo Scarabello), Ruptum (Plutarco Sporeno), Turùs (Paolo Fistulario). A Spilimberc invezit, se pûr intun mût clandestin, si faseve cognossi la opare di Eusebi Stele (1610-1671) che, forsi ancje in graciis di cheste difusion controlade, al podeve permetisi un lengaç une vore realistic e disinibît, riferît soredut ae sfere sessuâl.

Ermes di Colorêt, autôr di grande fuarce espressive e ispirazion, che al passe cun disinvolture dal gjenar seri al burlesc, ae critiche dai costums. Il secul seguitîf lu consacre tant che model di lenghe e di stîl, diferenziantlu dal Sîscent baroc, ancje se il Colorêt al condivideve cui siei contemporanis, se pûr cun origjinalitât, diviersis tematichis.

La trasmission dai scrits, l’ûs di un furlan che si svicine a chel che cumò al ven clamât koinè, a contribuissin a fissâ lis carateristichis dal furlan leterari che, tacant di Colorêt, si stabilìs su formis centrâls. Ancje cence deventâ une vere tradizion, jenfri dai doi secui la ereditât dal Colorêt e sarà presinte in autôrs come Antoni Dragon, Just Fontanin, Bernardin Cancianin e Gabriêl Pacian di Cividât. Tra Sîs e Sietcent si fasin sintî ancje lis varietâts margjinâls e a imponisi su dutis e je la aree gurizane cun Zuan Marie Marussig, Zuan Josef Busiç e Marzi di Strassolt.

Pagina aggiornata il 31.05.2016