Il Votcent

Tra Siet e Votcent e zire ator pes sagris dal Friûl une figure singolâr di poete contadin, Florindo Mariuzza che i siei viers a son deventâts part dal repertori popolâr.

Chel che al vignarà considerât il poete par ecelence dal Votcent al è Pieri Zorut (1792-1867). Cun Zorut al à une grande fortune il gjenar dal lunari o strolic, un librut avonde piçul di stâ te sachete e che al ripuartave, framieç dai calendaris e dai conseis pes culturis, pronostics e composizions in rime. Il so Strolic al comparìs pe prime volte tal 1821 fintremai ae muart di Zorut tal 1867.

Intai lunaris stampâts te aree gurizane si sperimente une prose adate ae comunicazion, une scriture utile, pensade par educâ la classe contadine, e par chest significative, ancje se influençade dal talian.

Un lessic curât e siôr di peraulis al segne invezit il debut te leterature furlane de prime vôs feminine cognossude, Catarine Percude (1812-1887). Lis sôs contis e liendis a patissin un pôc dal program votcentesc di difondi tra lis popolazions urbanis e rurâls une leterature cun finalitâts educativis e patriotichis. Lis prosis par furlan, in cualchi câs produzions origjinâls e in cualchi altri câs rielaborazions di motîfs popolârs, a otegnin risultâts stilistics une vore alts.

Sedi Zorut che la Percude a scrivin intun furlan che al lasse in bande i elements margjinâi. Lis lôr sieltis a segnin la strade pe lenghe scrite unitarie.

Te seconde metât dal Votcent a cjapin cuarp cun vigôr i studis su la lenghe furlane. L’interès pal mont popolâr al prodûs racueltis di cjants, detulis e mûts di dî. Cu la opare di Jacopo e Giulio Andrea Pirona si concretize il progjet dal vocabolari furlan, publicât tal 1871, e tal 1873 il glotolic gurizan Graziadio Isaia Ascoli al fâs la prime descrizion sientifiche de lenghe furlane tai siei Saggi ladini.

Pagina aggiornata il 31.05.2016