Lis origjins

I prins tescj leteraris furlans a forin scrits tra la seconde metât dal Tresinte e il prin Cuatricent. In chei agns l’ûs dal idiome locâl tes scrituris pratichis al è fuart, ma e je une fortune improvise e svoladie. Il furlan tant che lenghe di ûs e ‘di cancelarie’ al finirà par sparî dal dut sul imprin dal Cinccent. Cualchi sclese a ‘nt reste tai documents plui antîcs: a son olmis scuindudis daûr de ‘mascare’ dal latin o ben bocons di furlan primitîf. Rodui censuâi, cjartis contabilis, notis aministrativis e cuaders di cjamerârs a son il lûc dulà che il furlan al ven scrit: sul imprin intun mût inspietât, cualchi volte dome tai nons di personis o puescj; plui indevant, come tes listis des confraternitis, cun frasis interiis.

A son stâts scrits tor il Tresinte i esercizis di version dal furlan al latin che a documentin la ativitât didatiche che si faseve te scuele notarîl di Cividât.

Chescj documents, des primis atestazions dal Dusinte fint a chês plui sioris che si àn dopo dal 1350, a son conservâts tai centris principâi dulà che si disvilupave la vite culturâl dal patriarcjât. Cividât, sede dal Ducât langobart e dal prin patriarcjât, e manten vie pai secui une sorte di primât tal dânus fûr i tescj des origjins. Tai agns dal patriarcjât ghibelin (1077-1250), cuant che i patriarcjis, la nobiltât feudâl e l’esercit a jerin di divignince todescje, la cort patriarcjâl e i modei lenghistics e leteraris che cheste e impuartave nus dimostrin a clâr che il Friûl medievâl al jere plurilengâl. Dongje dal latin al jere di fat, tant che lenghe ‘alte’ o uficiâl, il todesc. Plui inlà tal timp, cui gnûfs patriarcjis che no vignivin zaromai plui di là des Alps, la regjon si vierç aes influencis che a rivavin de penisule taliane: provençâls, toscovenitis, o in ogni câs di stamp ‘talian’.

A son di chescj secui i prins tescj poetics par furlan, componiments isolâts e ocasionâi cuntune datazion pôc sigure come la balade scrite par cividin antîc Piruç myo doç inculurit, atribuide al nodâr Antonio Porenzoni e ripuartade sul daûr di un at notarîl dal 1380, il contrast amorôs che al ven simpri di Cividât Biello dumnlo di valor notât su la cuviertine di un cuader dal nodâr Simone di Vittore di Feltre (1416) e tal ultin il Soneto furlan (E là four del nuestri chiamp) un contrast amorôs anonim e di cronologjie incierte.

Pagina aggiornata il 31.05.2016