Tradizions furlanis

La tormentade storie dal popul furlan, fate di vueris, dominazions, disgraciis e emigrazion no jere rivade a crevâ la identitât di fonde dal Friûl e a snaturâ la antighe culture agrarie, tant che i segns di cheste ultime si son sprolungjâts fin ae prime metât dal Nûfcent. A partî di chest periodi, di fat, la ricostruzion post beliche, l’avent di une economie industrializade e tecnologjiche, po dopo il drame dal taramot e la seguitive ricostruzion e alfin il plui scosagn e resint moviment di globalizazion de culture e dai costums a àn puartât ancje in Friûl la svelte sostituzion de cussì clamade “sub culture provinciâl” cui plui conformâts schemis antropologjics europeans e soredut cui modei forescj oltri atlantics.

Fin dilà de seconde metât dal Nûfcent la principâl e dispès uniche font di ricjece de popolazion e jere la tiere, cui rituâi de semine e des racueltis che a ritmavin la vite di dute la coletivitât. La famee e jere la unitât produtive elementâr, là che ogni membri al veve une precise funzion operative. I timps dal lavôr a jerin dal dut dipendents des vicendis astronomichis e meteorologjichis leadis al corisi daûr des stagjons. La vierte e vierzeve il periodi dal lavôr plui penç che al leve indenant par dute l’Istât e si sierave cu la sierade daspò la conclusion des racueltis. Ancje tal timp de stasi invernâl pal contadin e la sô famee no jere pussibilitât di ozi, parcè che a jerin i animâi de stale e dal curtîl di curâ, la riparazion de cjase e dai edificis dongje, la revision dai imprescj e i lavôrs dal bosc di fâ. Lis seris di Invier a jerin acompagnadis des contis di fats sucedûts, di liendis, di contis dal imagjinari coletîf che cence polse a tramandavin il bagai de culture subalterne. I prodots otignûts dal lavôr de tiere,  ben conservâts e ben dosâts dilunc i mês invernâi, a coventavin pe sorevivence de famee, pai piçui barats e par compensâ aiûts di prestazions lavorativis. Di cheste gjestion autarchiche di une economie di sussistence, po dopo, cul timp si diferenziarin i svariâts tips di mistîr e di artesanât, che a lôr volte a costituirin une altre impuartante fase de storie economiche dal Friûl.

La cjase, une vore funzionâl, e rispuindeve aes strentis esigjencis rurâls dai abitadôrs e e jere costruide cun materiâi cjatâts sul puest; duncje e jere diferent di zone a zone, secont lis diferencis climatichis - ambientâls de regjon, che juste apont a determinavin lis diferentis formis di architeture spontaniis. Tantis voltis lis cjasis a jerin tacadis une a che altre e dutis chês dai contadinis a vevin luncs puiûi esponûts al soreli che a jerin bogns par suiâ i prodots. L’element che al acomunave lis cjasis des svariadis zonis al jere cence altri il fogolâr, che, dilà di assolvi lis naturâls funzions pe cusine e pal riscjaldament dai ambients, al costitutive il vêr e propri cûr dal sisteme familiâr e sociâl.

Le alimentazion e jere naturâl, ma puare, mancjant i prodots di bon valôr nutritîf pe mancjance des precauzions e des tecnichis di culture di vuê. La cusine popolâr si fondave su prodots elementârs, ma ben cumbinâts. Tantis a jerin lis mestis, tantis lis mignestris e diviersis lis varietâts des fertaiis. La bevande dai pascj al jere il vin, che tantis voltis al vignive bevût slungjât cun aghe par dosâ il consum. Il mangjâ al vignive donât intes principâls ricorences e al esaltave lis fiestis, invezit la rinunzie al mangjâ (fâ vilie) e costituive un rispiet des tradizions religjosis. Tantis sagris a jerin colegadis a prodots stagjonâi e no mancjavin ufiertis di propiziazion e di ringraciament ae Glesie cui prodots de tiere. La fieste e jere la uniche ocasion lecite, in pratiche un alibi, par cualchi gjoldiment ecezionâl, ritualizât e sacralizât de ocasion tradizionaliste e plui spes des scjadincis liturgjichis e dai costums religjôs. Il gustâ coletîf, oltri che come conclusion de fieste civîl e religjose, al vignive organizât ancje in ocasion de fieste dai svariâts “rituâi di passaç” de vite dal singul consacrâts ae fede cristiane. La popolazion e jere bandonade a se stesse e viveve sot il pês de precarietât dai events te plui difondude ignorance, tant che in câs di malatie e ricoreve a metodis empirics e ancje ai bevarins di mâcs e striis. Pai malans plui comuns al esisteve une specie di pront intervent fat di rimiedis naturâi, invezit il persisti dal mâl al podeve derivâ di azions di malefici o dal cjastì di Diu, al cuâl si contraponevin azions di sconzûr, preieris e benedizions.

Il vistît popolâr al jere funzionâl al ambient pes cundizions climatichis e pal lavôr e aes circostancis locâls pe incidence socio – economiche. La diferenziazion si regjistrave fra i vistîts feriâi (dai dîs di vore) e chei festîfs (dai dîs di fieste), plui rics, colorâts e fins. I vistîts però a jerin pôcs e spes a duravin fin ae muart, contribuint cussì a trasmeti e perpetuâ lis costantis dal vistît. Si paravisi dal frêt metint mantelis, siai e sorecjalcis. Une volte a jerin difondudis lis coltivazions de cjanaipe e dal lin, e ancje l’arlevament dai ovins che a devin la materie prime pai tiessûts plui doprâts, tal solit contest autarchic.

A partî dal replicant ritmi astronomic dal soreli che al determine il cori des stagjons e duncje il cicli des oparis agrariis, fin de antichitât l’om al veve metût des fiestis tai ponts nevralgjics dal an costituîts di solstizis, dai ecuinozis e des scjadincis principâls dai lavôrs de tiere, su lis cualis il cristianisim al à metût parsore lis propriis fiestis liturgjichis, che a conferirin ulteriôr impuartance e spessôr festîf aes stessis ricorencis. I rituâi solârs dal fûc a esaltavin i moments fondamentâi dal cicli, o sei i doi solstizis, che la Glesie dopo e consacrà inte nassite di Crist e dal so predecessôr, Zuan il Batiste, invezit intai altris moments dal rinovament anuâl, confinâts dal Carnevâl e dai Sants, si ricreave il stât di caos iniziâl che al unive simbui positîfs e negatîfs. Moment impuartant dal cicli anuâl al jere il solstizi de Istât, pic stagjonâl, là che si rinovavin, dilà des cerimoniis solârs, rituâi magjics di caratar apotropaic e divinatori, invezit dilunc il periodi estîf, al rivave il solêf des sagris paisanis. Par dute la Istât si davuelzevin ancje i perdons, i avôts e lis visitis ai santuaris dal mont al mâr, tradizions religjiosis che de Ete di Mieç a rivarin al Nûfcent e che i steve daûr il tratament e il moment di fieste comunitarie. La ultime grande fieste colegade al cicli agrari e jere chê di San Martin che si davuelzeve sul crinâl dal Autun su lis olmis dal rimit Shamain celtic. La fieste di San Martin e rapresentave il confin ultin dal cicli, o sei il so finî dopo dutis lis racueltis dai prodots de tiere. Il vivi dal popul furlan al jere cussì segnât dal alternâsi dal timp profan, dal dûr lavôr di ogni dì e di chel cerimoniâl de fieste, secont i ciclis invariâts dal calendari.

Pagina aggiornata il 31.05.2016