La Fieste dal Friûl 

Il 3 di Avrîl dal 1077 e jeune date fondamentâl pe storie dal Friûl. In cheste date al nassè di fat il Stât patriarcjâl furlan (la Patrie dal Friûl), une istituzion vuidade dal Patriarcje di Aquilee che al tignarà adun fintremai il XVIII secul il Friûl e tancj altris teritoris dongje di chel.

Chel che al colpìs di plui, e al va sotliniât, al è l’alt nivel di democrazie che al rivà a tocjâ il Parlament de Patrie dulà che a partecipavin no dome nobii e clericât ma ancje i rapresentants dai Comuns.

In dì di vuê, la Fieste dal Friûl e rapresente un moment di fonde par ricuardâ la nestre storie e rinovâ la coesion dal popul furlan tai siei principis di unitât e autonomie.

Memoreâ il 3 di Avrîl al vûl dî, di fat, tornâ a scuvierzi lis nestris origjinis e chel sintiment di identitât che, come furlans, o vin di vê tant che popul. Rindisi cont de nestre storie, culture, tradizions e de nestre lenghe al vûl dî cognossi lis nestris lidrîs, vê dai ponts di riferiment e une sorte di bussule che nus judi tal dialic interculturâl e tal confront cun chei altris e il 3 di Avrîl, Fieste dal Friûl, nus ten iniment dut chest.

Al è duncje par chest che ogni an la Provincie di Udin e coordene la ativitât di promozion des manifestazions organizadis dai ents e des associazions dal teritori par cheste ocasion. Cun di plui, in colaborazion cu la Provincie di Pordenon al ven organizât un concors pai arlêfs des scuelis primariis e secondariis inferiôrs che al premie i dissens plui biei che a rapresentin un event impuartant te storie dal Friûl.