Su un campion di 14 stradis provinciâls ogni dì a passin 112 mil veicui, ogni mês 3 milions e 300 mil, ogni an 41 milions (mês di riferiment Mai 2011). E je la zone di Porpêt chê che e sopuarte il  flus plui grant di veicui pesants. A son dome pôcs dai dâts presentâts te cunvigne finâl di “Easy Foot – lasse che al sedi il timp a cori” il progjet integrât di sigurece stradâl de Provincie di Udin, finanziât de Regjon Fvj e de Provincie e coordenât dal Automobile Club di Udin. A vierzi i lavôrs il president de Provincie on. Pietro Fontanini, l’arcivescul di Udin bonsignôr Andrea Bruno Mazzocato e il sindic di Codroip Fabio Marchetti. «Un dai obietîfs centrâts di cheste iniziative – al à dit il president Fontanini – al è che pardabon il numar dai incidents mortâi al è in câl. E chest, indi soi sigûr, ancje in gracie de grande campagne di sensibilizazion inviade te suaze di chest progjet finanziât de Regjon e di chest ent». A sotliniâ la impuartance de sigurece stradâl ancje bonsignôr Mazzocato che al à rimarcât come che no vedin di lâ mai pierdûts di viste cierts valôrs fondamentâi: la vite e je biele se la si vîf cun intindiments impuartants. Se di une bande istituzions come la Provincie a àn di lâ indenant cun iniziativis come cheste, la Glesie e à di educâ i zovins a cjapâ la proprie vite sul seri: se si crôt che dut al sedi un zûc nuie al à plui sens. Une vore sintût l’intervent dal za assessôr ae viabilitât e sigurece stradâl Fabio Marchetti che al à fat de sigurece stradâl un vêr cjaval di bataie, partint di zero e rivant a risultâts che no si speravin. «Cuant che tal ’99 o soi rivât in Provincie come aministradôr, cheste tiere e veve dai bruts primâts: tierce in Italie e prime in regjon pe pericolositât des stradis. Dal sigûr, sul dât al incît une vore il fat che la zone di competence dal ent intermedi e je grande, ma e jere une vere mancjance di culture de sigurece, cun mancjance di progjets in chest setôr. Vuê tante strade e je stade fate – al à ricuardât Marchetti – e i risultâts a son sot i voi di ducj, e aes Provinciis al va dal sigûr cualchi merit. Se lis infrastruturis tal nestri Paîs a continuin a jessi a nivei di ecelence, al va zontât il fat che si è difondude une grande cussience e plui atenzion». Marchetti, al dilà di ricuardâ il fat che aes Provinciis a son stadis assegnadis competencis che a garantissin une azion a 360°(come par esempli la Motorizazion Civîl), al à metût in lûs cemût che «dal 2008 la Provincie di Udin si è dotade di un assessorât ae Sigurece stradâl, la struture che e mancjave par podê procedi cun concretece in chest setôr. Al è propri in chest senari che si è disvilupât Easy Foot».