A son stâts inaugurâts tai dîs passâts i lavôrs di consolidament dal puint in localitât Tese in Val Resie, manufat danezât de diluvion dai 9 di Setembar dal 2009. A taiâ la curdele, jenfri chei altris, il president de Provincie on. Pietro Fontanini e il sindic di Resie Sergio Chinese. Un intervent di 500 mil euros che la dite che e à vinçût la gare par fâ i lavôrs (Cimenti srl di Davâr) e à fat dome in 4 mês. «Une opare impuartante pai roseans – al à dit Fontanini – che e coleghe in maniere svelte dôs valadis e che si met dentri intun contest paisagjistic spetacolâr mete, soredut vie pe Istât, di tancj apassionâts de montagne che chi a puedin fâ des escursions maraveosis cun, sul sfont, la grandece de Mont Cjanine». Di là dut câs de sô valence turistiche, come che al à sotliniât il prin citadin dal piçul comun di mont, il manufat al è fondamentâl soredut pai residents che, dal 1920, an che al è stât fat, a àn podût rivâ cun facilitât in dute la valade. Ma i lavôrs a son stâts ancje la ocasion par “dâur justizie” ai abitants di Resie. Come che al à dit Fontanini, «o vin proviodût al rinovament de cartelonistiche su la provinciâl Val Resie: a son stâts metûts i cartei bilengâi par talian e par rosean». L’intervent, come dit, al à rivuardât il puint a 3 arcadis su la S.P. n° 42 de Val Resie, in localitât Tese, al km 9+200. I lavôrs a àn interessât sedi lis fondis, sedi i paraments, sedi lis voltis e l’impalcât dal puint. I arcs a son stâts pontâts midiant perforazions e ribatiduris inietadis fatis di sore dal puint. Dutis lis superficiis dai arcs a son stadis netadis e i scarics de aghe che a jerin a son stâts ripristinâts. Ae fonde de pile de bande de val a son stâts realizâts micropâi di grant diametri, e ancje lis rifondazions peadis aes sotstruturis des spalis a mieç di ribatiduris. Dutis dôs lis oparis a son stadis fodradis cun pieris compagnis di chês che a jerin. Al è stât fat il consolidament des pilis centrâls dal puint midiant la realizazion di micropâi e di rifondazions peadis aes sotstruturis des pilis traviers ribatiduris. Ancje in chest câs si è procedût al rivistiment cun pieris compagnis di chês che a jerin. Parsore il puint e je stade gjavade la pavimentazion che e jere par realizâ lis oparis che a coventin pal consolidament dai arcs. In ultin e je stade realizade la solete monolitiche par distribuî i carics in maniere avuâl jenfri il cordul laterâl.