Funzions e competencis

La Provincie di Udin e je une des cuatri de Regjon Friûl - Vignesie Julie. E je la plui grande par estension e par numar di abitants, in plui di sei la plui antighe, par vie che e cjape dentri la plui part dal Friûl storic.

Cemût che al previôt il Statût: "La Provincie di Udin e je un Ent autonom teritoriâl che al cure i interès e che al promôf il disvilup de comunitât provinciâl su la fonde dai principis di sussidiarietât e di diferenziazion socioculturâl che a son tal teritori, cirint di rivâ ai obietîfs fissâts dai principis fondamentâi de Costituzion de Republiche. Par un tant, la Provincie e promôf iniziativis che a tindin a incressi la paritât di oportunitât di ducj chei che a fasin part de comunitât provinciâl".

L’Ent al indrece la sô ativitât viers la tutele dai patrimonis culturâi che a son spieli des specificitâts des diviersis realtâts che a son tal teritori, metint in vore iniziativis coordenadis e indreçadis a cognossilis e fâlis cognossi, a conservâlis, valorizâlis e doprâlis.

Prime de L.R. 26/2014 lis competencis de Provincie a son stadi tantis: programazion e promozion de culture, de istruzion e de difese dal ambient, des ativitâts sociâls, assistenziâls e de solidarietât, de viabilitât e dai traspuarts publics locâi, des ativitâts sportivis, de cjace e dal turisim. L’ent al à sburtât une vore pe tutele e pe valorizazion de lenghe furlane, tant che valôr di no podê fâ di mancul e tant che espression de identitât dal popul furlan. Cu la riforme dai ents locâi, che di fat e à scancelât lis provinciis, la Provincie di Udin e je stade "disvuedade" di cuasi dutis lis chestis competencis che a son stadis trasferidis ae Regjon e ai comuns. Ae Provincie, fin ae conclusion de ativitât cul mandât che si sierarà tal 2018, a restaran dome funzions residuâls (ambient, tutele rom, patrimoni).

La Provincie, dut câs, compatibilmentri cu lis funzions che i restin, e sburte ogni forme di colaborazion cul Stât, la Regjon, i Comuns e cun chei altris Ents publics, e ancje cu lis istituzions locâls di paîs europeans e di Stâts dulà che a son storichementri inlidrisadis comunitâts di çoc furlan.

Il President de Provincie al è stât elet dai citadins a vôt universâl e diret (l'ultin mandât al va dal 2013 al 2018), al è membri dal Consei provinciâl, al rapresente l’Ent, al clame dongje e al è da cjâf de Zonte e al sorintint al funzionament dai servizis e dai uficis.

Il Consei al è l’orghin di direzion, di organizazion fondamentâl e di control politic aministratîf de Provincie.

La Zonte e colabore cul President tal guvier de Provincie e e si môf cun deliberazions colegjâls.

Dal 1951 a vuê i Presidents de Provincie di Udin a son stâts:

- av. Agostino Candolini;

- prof. Luigi Burtulo;

- av. Vinicio Turello;

- prof. Giancarlo Englaro;

- sâr Tiziano Venier;

- av. Giovanni Pelizzo;

- cav.lav. dot. inz. Carlo Emanuele Melzi;

- prof. Marzio Strassoldo di Graffembergo;

- on. Pietro Fontanini

Pagina aggiornata il 15.07.2016