Storie

La Provincie di Udin e nas tal 1797 tant che dipartiment di Passarian, istituît di Napoleon Bonaparte, dopo che al veve concuistade la Patrie dal Friûl. Ancje se il non dal dipartiment al rivoche la vile dogâl tes campagnis dal Friûl di Mieç, Udin al fâs simpri di cjâf lûc a di une entitât teritoriâl che e vignarà ricognossude ancje tai sistemis politics daspò. Tant cui austriacs, te suaze dal Ream Lombart Venit – te prime part dal Votcent – che cui talians – dal 1866 incà – la Provincie di Udin o dal Friûl e risulte une realtât aministrative salde.

 Te Provincie, prime direzude di un Prefet, emanazion dal podê centrâl, po un Cjapitani e po ancjemò un Prefet, a nassin orghins consultîfs, pal plui dâts dongje de sorestanzie di in chê volte, che a rapresentin la lidrîs de rapresentance democratiche dai citadins dal dì di vuê. Vie pal Votcent, l’Ent al interven in svariâts setôrs sociâi e de economie cuntun pês determinant e al met lis fondis pal disvilup di un teritori cetant grant e puar, fiscât di une emigrazion massive e di une schirie disgraciade di acjadiments storics e naturâi. Udin e la sô Provincie, intant de prime vuere mondiâl, a son innomenâts tant che sede dal comant suprem dal esercit talian e, daspò de sbaraiade di Cjaorêt, pe invasion des armadis austriachis e todescjis.

 L'Ent – deventât Deputazion provinciâl cu la evoluzion aministrative dai prins timps daspò de vuere – al è un riferiment pes aministrazions locâls e al invie une politiche gnove che però e ven çoncjade di colp de ditature. Te seconde vuere mondiâl, intune regjon tibiade de ocupazion e slambrade de vuere civîl e nas une Provincie gnove, buine di promovi un disvilup autentic, ancje se partint di pocjis competencis.

 La elezion democratiche de rapresentance provinciâl, su la fonde dai coleçs uninominâi, e à dât plui fuarce al leam cul teritori, che, vie pai agns, al è gambiât. Daspò de prime vuere mondiâl si à zontât il mandament di Çarvignan, lassant tal 1968 il Friûl ocidentâl ae a pene nassude Provincie di Pordenon. La creazion de Regjon Autonome Friûl-Vignesie Julie, tal 1963, no à comprometût la identificazion dai citadins cu la Provincie di Udin, che anzit si è infuartide, a considerâ cemût che e je stade frontade la prove de emergjence e de ricostruzion, daspò dai taramots dal 1976. Passade la riforme dai Ents locâi, la Provincie di Udin si è impegnade tal compit di coordenâ i siei 137 Comuns, cun funzions di programazion e di promozion di ativitâts culturâls, sociâls, di protezion ambientâl e pal disvilup teritoriâl.

 La eficacitât aministrative, la modernizazion des struturis stradâls, il cjapâ di une identitât specifiche te suaze dai Ents Locâi, i garantissin ae Provincie di Udin un puest di referent privilegjât pai citadins, tal nivel miezan.

Pagina aggiornata il 01.06.2016