Minorance slovene

La comunitât slovene in Friûl – Vignesie Julie

 I Slovens in Italie si son  insediâts vie pai secui inte regjon intes trê provinciis dilunc dal confin cu la Slovenie: Triest (Trst), Gurize (Gorica) e Udin (Videm o Viden).

I comuns de provincie di Udin dulà che e je presinte la minorance slovene a son: Tarvis, Malborghet-Valbrune, Resie, Lusevare, Taipane, Nimis, Atimis, Faedis, Torean, Pulfar, Savogne, Sant Pieri dai Sclavons, Sant Lenart, Grimac, Drencje, Stregne, Prepot e Cividât. In chescj comuns la popolazion e conserve e e dopre inmò diviersis formis dialetâls slovenis. Il dialet sloven al è clamât: po našan in Val Cjanâl, po näs a Resie, po našin intes Vals de Tor e dal Cuarnap, po našem e po sloviensko intes Vals dal Nadison.

Struc di storie de Slavie furlane

 L’insediament di popolazions slavis intai teritoris de Val Cjanâl, Cjanâl dal Fier e Val Resie, plui chel de Val de Tor, dal Cuarnap e des Vals dal Nadison al è tacât intal VI e VII secul dopo Crist.

Lis valadis a àn vût vicendis storichis diferentis. La Val Cjanâl par un grum di secui e je stade part dal Imperi Austro Ungaric e e je passade al Ream di Italie dome intal 1918. La Val Resie e à fat part de abazie di Mueç, che e jere part dal Patriarcjât di Aquilee (fint al 1420). Po dopo, come il Friûl, e fasè part de Republiche di Vignesie. A cjaval dal Sîscent e intai prins agns dal Sietcent e fo par plui voltis sot dal Imperi asburgjic e intal 1866 e passà sot dal Ream di Italie.

Dal 1077 al 1420 lis Vals dal Nadison e de Tor a forin sot dal Patriarcjât di Aquilee e po dopo sot de Republiche di Vignesie (fint al 1797). In chest periodi lis vals a verin une grande autonomie aministrative e judiziarie. Intal 1866 a jentrarin a fâ part dal Ream di Italie.

Cu la creazion dal Stât talian e la vignude dal fassisim vi fo il tentatîf di risolvi la cuistion de minorance linguistiche slovene: l’ûs de lenghe di minorance al fo une vore contrastât no dome te vite publiche ma ancje in contescj plui intims come la preiere e il cjant; la culture e podeve jessi pandude dome midiant dal talian.

Intal secont dopovuere, cu la vignude de cussì clamade “vuere frede” la comunitât slovene e fo viodude come element di disturp di bande des istituzions. A forin cussì ostacoladis iniziativis di politiche linguistiche e cheste situazion e impedì une cressite culturâl e sociâl de comunitât slovene. In chest periodi la Slavie e fo ancje interessade di un grant fenomen migratori. Daspò il taramot dal 1976 ancje la Slavie e fo une vore tibiade e dilunc de ricostruzion materiâl ancje inte comunitât slovene dal Friûl si notà une rinassite culturâl cun manifestazions e cetantis iniziativis.

Ai 21 di Dicembar dal 2007 la colade dal confin tra Italie e Slovenie, che al veve segnât cussì a fuart la storie di chescj puescj, e je stade saludade cun sperance e entusiasim di bande des popolazions de Slavie e des valadis dal Lusinç.

Pagina aggiornata il 06.06.2016