Minorance todescje

Il Friûl – Vignesie Julie e je la uniche regjon taliane dulà che si cjatin ducj trê i grups linguistics indoeuropeans. Dilà dal talian, di fat, si fevele il furlan, cualchi varietât slovenofone e altris di fonde todescje.

Chescj grups locâls si cjatin in dì di vuê inte regjon daspò i cambiaments dai confins teritoriâls provocâts des vueris dai ultins doi secui.

Lis minorancis di lenghe todescje a son presintis dilunc di dut l’arc alpin talian, de Val d’Aosta fint al Friûl. Se difat il todesc (lenghe indoeuropeane dal grup gjermanic) e je lenghe uficiâl in Austrie, Gjermanie, Svuizare e Lichtenstein, in Italie al ven fevelât, intes variantis locâls, in diviersis regjons alpinis. In particolâr al è pandût inte provincie autonome di Bolzan, ma a son gjermanofons ancje i Walzer in Val d’Aosta, i Mocheni in provincie di Trent e a Sapade in provincie di Belum e i Cimbri in cualchi centri de provincie di Verone, Vicence e Trent.

In Friûl la lenghe todescje e je fevelade in dì di vuê, intes diviersis variantis, in cinc comuns de provincie di Udin: a Sauris/Zahre, Timau/Tischlbong e in trê comuns de Val Cjanâl (Pontebe/Pontafel, Malborghet-Valbrune/Malborgeth-Wolfsbach e Tarvis/Tarvis).

Intes localitâts di Sauris e Timau e ven doprade une lenghe antighe che e fâs part de çocje di chês altris varietâts todescjis e cimbris dal Nord Italie; inte Vâl Cjanâl invezit e ven fevelade une varietât carinziane, par il fat che il teritori une volte al jere domini dal Imperi Austro-Ungaric, che al veve il todesc come lenghe uficiâl.

Lant indaûr tal timp o cjatìn olmis di penetrazion todescje in Friûl za de ete medievâl, che a rivavin cheste volte soredut par vie dal inflùs dai nobii e dal clericam. La culture e la lenghe todescje a restarin di fat in chê volte limitadis cuasi dome a lis classis altis, no rivant fint ai strâts popolârs. Olmis di cheste influence si cjatin cuasi dome inte toponomastiche.

Dal pont di viste normatîf i dialets todescs dal Friûl a àn otignût il ricognossiment di lenghis minoritariis dome intal 1999, prime cu la leç regjonâl n. 4/1999 e po dopo cu la leç nazionâl n. 482/1999, dulà che a vegnin stabilîts proviodiments pe tutele e valorizazion des minorancis linguistichis storichis. Cu la leç regjonâl n. 20, Normis di tutele e promozion des minorancis di lenghe todescje dal Friûl – Vignesie Julie, fate buine dal Consei Regjonâl inte sentade dai 20 di Novembar dal 2009, la Regjon e fâs un altri pas indevant inte tutele e valorizazion des minorancis linguistichis presintis sul teritori.

Pagina aggiornata il 06.06.2016