La comunitât di Timau / Tischlbong – Comun di Paluce

 Logade intal Cjanâl di San Pieri, dongje de confluence dal Fontanone e de vecje vie Julia Augusta, la comunitât si fonde suntune storie tramandade a vôs dilunc i secui.

La tradizion e vûl che in chescj puescj si fossin insediâts, in moments diviers, doi grups distints di minadôrs che a vignivin des vals carinzianis dal Gail e dal Weissensee. Une prime comunitât e sarès datade al an Mil cirche e e sarès po dopo disparide par vie di un grant taramot o di une epidemie. Cheste liende e cjate une cierte conferme intai studis lessicografics e in particolâr intal antîc non todesc di Timau: Tischl-wang. La formazion di toponims cul radicâl “-wang” e finì di fat daspò dal 1100, e duncje la edificazion dal abitât e jere di prime.

Dal 1284 po dopo al varès di jessi un secont insediament. Ancje in chest câs lis contis popolârs a somein cjatâ conferme, par vie des afinitâts tra lis fevelis todescjis di Timau e i dialets carinzians dal medi alt todesc, a dimostrazion dal fat che grups di popolazions a saressin partîts dal sud de Austrie tor la fin dal 1200.

Tra il Cuatricent e il Cinccent la ativitât economiche principâl dal puest e jere la estrazion e la lavorazion dai minerâi, che e tirave dongje ancje lavoradôrs dilà dal confin.

Il paîs in chest periodi al cressè une vore, sedi demografichementri che economichementri, judât ancje dai tancj cramârs che si fermavin par rinfrancjâsi vie pe strade che ju varès puartâts intes contradis de Austrie e de Gjermanie.

Di chest periodi a son ancje i cetancj documents che a testemonein la origjin di cualchidun dai prins cognons timavês, come Prener, Unfer, Mentil e Primus.

Intai doi secui dopo il paîs al fo menaçât di cetantis lavinis e inondazions e intal 1729 al vignì sepulît dal dut di claps e glerie, cussì che i abitants a forin obleâts a tornâ a fâlu sù intune zone plui sigure.

Il  Votcent e il Nûfcent a forin par Timau secui scûrs. Il paîs al cognossè prime la plaie de emigrazion e po dopo al deventà teatri di scuintris sanganâts dilunc de Grande Vuere. Finîts i conflits mondiâi e tornà a scomençâ la emigrazion, la mancjance di ocupazion e la crisi gjenerâl de montagne che a àn puartât al spopolament de val. I timavês a larin cussì a cirî lavôr in Austrie, propit in chel paîs dulà che un mileni prime i lôr vons a jerin partîts par cirî fortune.

Sot dal aspiet linguistic a Timau e Casali Sega, localitât dal comun di Paluce, il repertori al è in gjenar triglossic pe presince dal timavês, dal furlan e dal talian. La triglossie e je inmò patrimoni de plui part de popolazion ancje se si note une diminuzion progressive de fevele timavese. Il talian al è simpri plui doprât come lenghe veicolâr di ogni dì e l’ûs dal dialet al è une vore ridot.

Come in dute la zone alpine lis migrazions a àn vût ancje a Timau une part une vore impuartante inte pierdite dal dialet timavês, ma une vore impuartante e je stade ancje la presince di cetantis fameis mischis, o ben chês dulà che un o ducj doi i gjenitôrs a vegnin di areis linguistichis diferentis.

No cate lis sôs dimensions une vore piçulis, la comunitât e je ative inte difese de lenghe e de culture cu la partecipazion di cetantis associazions come la Pro Loco Timau-Cleulis, la corâl “Teresina Unfer”, il circul culturâl “Giorgetto Unfer” e i grups folcloristics.

Pagina aggiornata il 06.06.2016