La lenghe furlane

  Il ‘repertori lenghistic’ dai furlans al è tant svariât e al cjape dentri, in plui che il furlan stes (che al à cetantis varietâts), ancje il talian e lis fevelis ‘aloglotis’ gjermanichis e slavis, che a son sui confins setentrionâi e orientâi de regjon.

 Lis fevelis gjermanichis a son tipichis di chês che si clamin ‘isulis lenghistichis’ des Alps Cjargnelis, Sauris/Zahre, Tamau/Tischelwang, in comun di Paluce, e Sapade/Plodn, in provincie di Belun, e si à di zontâ ancje i dialets carinzians de Valcjanâl, cun i centris principâi di Pontebe/Pontafel e di Tarvis.

 Lis fevelis slavis, par dî cun precision slovenis, a son invezit tipichis di dutis lis valadis che a confinin cu la Slovenie.

 In provincie di Udin a son impuartantis ancje lis fevelis dal Cjanâl di Resie, chês de alte Val de Tor, a nord est di Tarcint, e chês des vals dal Nadison, dopo dal Puint di sant Quarin. In provincie di Gurize il sloven si cjacare tal Cuei e, lant plui jù, tal Cjars, fintremai a cjapâ cuasi dute la provincie di Triest. Daspò a son lis varietâts venitis come il ‘lagunâr’ di Maran e di Grau, ma ancje il ‘bisiac’ di Monfalcon.

 Daûr dai dâts che a vegnin fûr dal ultin scandai sociolenghistic fat de Universitât dal Friûl, la popolazion cun ‘competence ative’ dal furlan, chê che e je buine di fevelâ par furlan, e varès di jessi ator dal mieç milion di personis, e che cuasi ducj a varessin la ‘competence passive’, ven a stâi che a saressin bogns di capî il furlan. A chest mieç milion di furlanofons residents in regjon si à di zontâ ancje un pôcs di miârs di emigrants, o di fîs di emigrants, che dispès a tegnin vive in cjase la lenghe dai vons. A son une vore impuartantis lis comunitâts furlanis che a son vuê in Europe centrâl, Gjermanie e Belgjiche, tes Americhis, massime in Canada (Toronto) e in Argjentine (la citadute di Colonia Caroya e je, par esempli, dute furlanofone), in Australie; chestis comunitâts a tegnin vîfs i rapuarts cul Friûl cuntune rêt di associazions di emigrants, tant che i Fogolârs furlans e lis Fameis furlanis. No son dâts precîs nancje su la consistence des comunitâts aloglotis. I gjermanofons che a son in regjon no varessin di jessi plui di doi o trê mil di lôr, invezit e je plui grande di numar la minorance slovene, che e varès di jessi di plui o mancul di 50.000 personis, cjapant tal cont ancje la provincie di Triest.