Il Museu de Civiltât Contadine dal Friûl Imperiâl, di proprietât di Michele Formentini, al racuei ogjets che a contin, e nus lassin in ereditât, la storie de civiltât contadine dal Friûl orientâl, di un precîs des Conteis di Gurize e di Gardiscje; il periodi storic rapresentât al scomence tor dal 1500 e si siere intal 1918; cuant che chei teritoris a jerin sot de Cjase di Austrie.

Al è logât dentri di une cjase viere de Basse Furlane, di fat un borc rurâl cu la cort sierade, caraterizât di plui fabricâts fats in etis diviersis.

Cjalant l'edifici che al ospite il Museu si ricognòs un nucli antîc che al è dal 1700, si viodin lis zontis dal Votcent e lis parts ritocjadis che a son dai prins agns dal 1900.

Il Museu, ospitât in grancj spazis, al da dongje une racuelte di cuasi vincj mil tocs di divierse nature, ducj leâts aes voris di une volte. La esposizion e je dividude in sezions eterogjeniis; tant spazi al è stât dedicât ai traspuarts: cjars di contadins cun dute la lôr feramente, plui cariolis e biroçs.

Tal Museu si pues osservâ une colezion di vuarzinis di plui epochis, di chês primordiâls fatis cuasi dutis di len a chês plui modernis; e je ca fintremai la prime vuarzine industriâl che e sedi rivade in Friûl, dal 1913.

Par fins museâi e soredut didatics, a son stadis riprodusudis une stale e une scudarie; lis mangjadoriis, trasformadis in bachechis une vore particolârs, a mostrin i ogjets plui piçui tant che smuars, fiers di cjaval e strighiis.

I ogjets che si puedin viodi a son une vore, dutis lis salis a son furnidis di stampis straordenariis e litografiis origjinâls di botaniche e zoologjie, cjartis gjeografichis e topografichis, edits e avîs di plui etis.

Diviersis sezions a son dedicadis aes ativitâts manuâls tant che chês dal muredôr, dal zeâr, dal cjaliâr, dal latâr. A son stâts ricostruîts in maniere fedêl, in ambients separâts, dut un laboratori di marangon e une buteghe di sieradurâr che e lasse maraveâts.

Passant dilunc dal percors, cierts ambients a contin aspiets de vite di ogni dì de cjase rurâl di une volte: a son piçulis cusinis tipichis dal Sîscent-Sietcent e dal Votcent, si cjate il camarin, la stanzie di lavôr dulà che lis feminis a lavavin e dulà che a sopressavin, la cjamare di durmî, la lissie, il bagn.

Tal secont plan altris sezions espositivis a contin de religjositât popolâr, dai aspiets leâts ae tiessidure e dal arlevament dai cavalîrs; une colezion speciâl e rivuarde i baûi di viaç.

Une particolaritât impuartante e je la sezion dedicade ai lavôrs des feminis: il Museu al ospite une mostre permanente di lavôrs des fameis Squarcialupi, De Stefani, Stagni e Tamburlini, ricams plens di incjant, blancjarie intime feminine di une volte, camisolins, buscj e cjamesis di gnot.