Al à aderît ae Rêt Museâl Provinciâl
Il Museu Gjeologjic de Cjargne al è ospitât dentri di Palaç Unfer e al racuei i reperts cjatâts in agns di ricercjis e studis sientifics su la gjeologjie dal teritori.
I reperts conservâts e esponûts a mostrin la evoluzion gjeologjiche in chest setôr alpin intal zîr di plui di 400 milions di agns. Di plui di cent agns diviers dai studiôs plui autorevui di gjeologjie a àn esaminât e indagât l’evolvisi di un teritori: i studis, di là de gjeologjie, a àn cjapât in considerazion ancje i fossii.
Su la fonde di chescj studis e pe impuartance gjeologjiche dal teritori al è nassût il Museu di Dimpeç, par esponi il grant patrimoni gjeologjic e paleontologjic di grant interès sientific, costituît pal plui di fossii e crets.
Il Museu al è dividût in dôs sezions, il visitadôr al è acompagnât di panei didascalics di plui sortis, che a sclarissin lis variis fasis evolutivis de tiere, e ancje lis formis di vite che le à popolade.
Si scomence la visite dal periodi Ordovician Superiôr, il secont de ere Paleozoiche: di chel periodi a son i fossii plui arcaics che si cjatin intes Alps Cjargnelis.
Chescj fossii a son i esemplis di un pôc ducj i organisims che a vivevin intai fonts marins cuant che cheste aree e jere cuvierte di aghe.
Judât di esplicazions completis dai periodis gjeologjics, dai reperts fossii e des stratificazions dai crets, il visitadôr al fâs un viaç e al scuvierç lis Eris gjeologjichis che la tiere e à vût passât prime di rivâ ae Orogjenesi Alpine: ven a stâi cuant che la Cjargne e je stade cjapade dentri intal jevâsi de cjadene alpine. Cussì i fossii che vuê o viodìn a son sediments che si son formâts in crets che a contin une serie di evoluzions scomençade milions di agns indaûr.
Une sezion dal Museu e je risiervade ae proiezion di filmâts didatics e une altre e je destinade ai laboratoris didatics: in cheste maniere i fruts a puedin sperimentâ lis diviersis modalitâts di fossilizazion e i metodis principâi di classificazion e di ricognossiment dai crets.
Al è ancje une sorte di zûc da la ocje, che in maniere divertente e singolâr, al mene i fruts pai paisaçs de Cjargne, insegnant e rimarcant la funzion di palûts, lâts, slacs o gjavis.