Intal cûr dal Friûl, tra lis monts spetacolârs che a anticipin lis Alps, a son i zardins tropicâi de Cjase des Paveis di Bordan.  Un cjanton di nature esotiche cun plantis e animâi di formis e colôrs che a dan di maravee, dulà che si puedin amirâ libaris in svol une vore di paveis tropicâls.

Miârs di paveis, libaris di svolâ, a compagnaran dilunc di un percors che al fasarà visitâ la Amazonie, i boscs pluviâi plens di vite de Asie e lis junglis africanis misteriosis.

La Cjase des Paveis e je un gnûf model museâl, dulà che i visitadôrs a vegnin proietâts intune realtât naturâl che e stupìs, plene di contignûts e perfete par fâ capî i concets plui impuartants de biologjie, de ecologjie e des siencis naturâls in gjenar.

Lis alis lizeris, i colôrs sflandorôs che nus fasin preseâ tant lis paveis a son in realtât messaçs clârs che i insets a doprin par comunicâ.

Une grande sezion dedicade al “lengaç dai colôrs” al insegne a interpretâ lis alis des paveis, permetintnus di decifrâ ce che chescj animâi 'a disin' cui lôr svoi spetacolârs.

Di miliarts di agns il nestri planet al è un cjamp di bataie par milions di speciis viventis. Plantis e animâi si cjatin di un continui a competi tra di lôr, lotant cuintri di une estinzion ireversibile.

“Api, Fiori, Cavoli e Cicogne, la scienza della riproduzione” e je la gnove e mostre dedicade a un dai aspiets plui impuartants, intrigôs e ancjemò misteriôs de vite: la riproduzion.

Un percors espositîf ideât par grancj e piçui, là che animâi e plantis a contin lis strategjiis plui strambis che la evoluzion ur à concedût par vinci la competizion tant dure cun chês altris creaturis viventis e lassâ une dissendence. Saveviso che in cualchi pes a son i masclis a parturî? Che a son acars che si riprodusin cence jessi nassûts? Ise vere che i pêi sot dai braçs nus servissin a dispierdi un messaç atavic di amôr e al è par chest che a plasin lis tartufulis? Varessiso dite mai che cierts individuis masculins a rivin a riprodusisi dome se a fasin fente di jessi feminins? Dilunc dal percors, tancj esemplârs vivents a ilustrin lis diviersis modalitâts di riproduzion. Un sarpint di 3 metris che al prodûs calôr par clucî i siei ûfs, une cernie che e nas di ses feminin e e mûr di ses masculin e un camaleont che al gjenere clons di se, a son dome che un piçul esempli. Ancjemò une volte e sarà la nature a maraveânus e a apaiâ la nestre curiositât di simpri, pandint un pôc par volte lis regulis de vite. Regulis che la sience e à concuistât cun fadie e che masse dispès o ignorìn, e a son regulis fondamentâls par capî une des realtâts plui complessis dal univiers: l'om animâl.

Cui che al sielç di visitâ la Cjase des Paveis al jentre intun progjet ambiziôs di difese ambientâl e di disvilup  sostignibil, che lu sepi o no, e al jentre cussì intun altri mont.