Al à aderît ae Rêt Museâl Provinciâl
Il Museu di Art de Medaie e de Citât di Buie, logât intal borc antîc di Sant Laurinç in Mont al è il risultât di donazions, di acuisizions e di sgjâfs archeologjics.
Une part dal edifici e je destinade al Museu citadin di Buie e e nas tant che omaç espositîf ae proprie storie e ae proprie identitât.
La prime sezion espositive, dedicade a Buie, e presente une sintesi di reperts cjatâts tal teritori, in maniere ocasionâl o par vie di investigazions archeologjichis curadis; di fat, la storie insediative de aree dai timps dai romans fin ai principis dal secul XIX e ven contade midiant dai ogjets recuperâts dilunc des campagnis di sgjâf fatis li de Plêf di Sant Laurinç in Mont. A son de etât contemporanie lis testemoneancis materiâls de tierce sale, e tra chês une selezion dai “Mos” (bocâi di bire decorâts di crep o di veri) di tradizion bavarese, ereditât preziose, che e je un ricuart comovent dai emigrants furlans, in plui che une atestazion interessante di ûs, costums e avigniments dal passaç tra il secul XIX e il secul XX.
Chê altre part dal edifici e je dedicade ae Art de Medaie e e da dongje miârs tra fusions e coniazions; cheste racuelte e je il risultât di donazions di bande di autôrs o di lôr erêts e colezioniscj che a àn viodût intal Museu di Buie un pont di riferiment pe valorizazion e pal studi de art incisorie de medaie.
Veris oparis di art cun temis di tancj gjenars, lis medaiis a son un compendi de storie moderne, furlane e taliane, facil di capî ancje par un public no specialist; a cjapin dentri intun mont, cuasi miniât, inflùs artistics e moviments culturâi che a àn caraterizât une epoche.
Screât intal 1998 e intal 2006 inte gnove sede a Mont di Buie, il Museu al manifeste un ricognossiment just ai Mestris e Incisôrs buiês che a àn onorât Buie e il Friûl in dut il mont e al vûl rapresentâ un tribût ae Art de Medaie e aes sôs formis espressivis specifichis. Al vûl fâ cognossi aes gnovis gjenerazions i mestris incisôrs e medaiscj dal Nûfcent, che cu lis lôr oparis a àn lassât une ereditât culturâl siore e preziose.
Il percors museâl al è dividût in trê sezions espositivis; la prime e ten la colezion dai “Mestris e incisôrs buiês”: nassude propit par presentâ lis oparis plui interessantis e significativis che a àn fat che i artiscj di chenti a sigurassin a Buie il titul di “Citât di Art de Medaie”. Lant daûr dal percors espositîf, si rive ae stanzie dedicade a “Il taramot inte medaie – regâl al Friûl”, racuelte tematiche, uniche intal so gjenar, dedicade al taramot che al à savoltât il Friûl intal 1976: in cheste a son figurâts fats, emozions e sintiments in plui di cent e vincj medaiis fatis e regaladis di cincuante artiscj talians.
Infin e je une sezion didatiche specifiche “Cemût che e nas une medaie, la Regjine Teodolinde” là che si presente la idee e la nassite di une medaie discuvierzint cussì ducj i segrets di cheste particolâr espression artistiche. Traviers fotografiis, dissens, zes, fusions e conis si pues scuvierzi i varis passaçs che a coventin par cugnâ une medaie; no dome, la didatiche, cun panei naratîfs, e fâs la liste des tecnichis di fusion e e conte la lungje 'storie' de medaie de sô nassite intal 1500, ae sô evoluzion intal 1700, fin in dì di vuê.
Un altri patrimoni si zonte al circuit espositîf: la donazion Pietro Giampaoli. La colezion, là che a risaltin i ritrats dedicâts ae femine e ai cinc fîs dal artist, e propon lis diviersis fasis di realizazion de medaie e e presente cierts zes là che ancjemò si notin lis ritocjadis origjinâls dal mestri, par cirî di rivâ ae perfezion artistiche. A son tocs unics di grande impuartance: un percors inte sfere dai afiets dal artist traviers des sôs oparis; un osservatori favorît par capî, di là de gjenialitât dal artist, ancje la nassite de monede, tant innomenade, di 500 liris di arint, batude dal Stât Talian in plui di cent milions di esemplârs.