La vile di Top-Flori, dal Sietcent, dopo dai lavôrs di restaur che a son a pene finîts, e tornarà a ospitâ il Museu de Civiltât dal Vin, che vuê al è inte scuele medie li dongje. La esposizion su la Civiltât dal Vin e nas par mantignî vive la memorie e valorizâ la vocazion vitivinicule che e à caraterizât e che e caraterize ancje cumò chest teritori.
Il Museu al da il bon acet al visitadôr e lu acompagne par fâi scuvierzi lis variis fasis dal cicli produtîf dal vin, de culture ae vinificazion, dal cumierç ae cerce fin aes ativitâts artesanâls che i zirin ator.
Il Museu al da dongje no dome lis testemoneancis materiâls, ma al conserve ancje une racuelte bibliografiche e documentâl specialistiche, cun rivistis e libris interessants, antîcs e modernis, dal setôr vitivinicul. Il percors espositîf furnît di panei che a presentin dut in detai e cun fotografiis, al conte in maniere sugjestive e curade il savê tecnic e sientific di une tradizion vitivinicule di une volte, che cumò si è trasformade scuasi dal dut.
O podìn amirâ i struments pe misurazion dai terens, i imprescj par preparâ lis areis destinadis ai vignâi, i imprescj pal implant des vîts, i struments pe racuelte e il tratament de ue. Al è interessant osservâ i imprescj e lis tecnichis che, une volte, i contadins furlans a àn doprât par provâ di difindisi de filossare, un piçul inset origjinari de Americhe che intal secul XIX al à fat murî o al à vuastât in maniere serie scuasi ducj i vignâi di Europe. La racuelte interessante e conte des tecnichis di vinificazion, de cantine e dai contignidôrs pal vin, la mostre e previôt la presince dai struments par folâ la ue e i contignidôrs pe fermentazion, lis misuris, i recipients, i imprescj par imbutiliâ e i mieçs enologjics par controlâ la cualitât dal vin.
No mancjin i turclis carateristics, lis machinis primitivis pal imbutiliament, damigjanis pal traspuart feroviari, struments tant che lis pompis par stravasâ e i scjaldins pe cantine di crep o di ram. Par contignî, sfrancjâ, invecjâ e traspuartâ il vin, fin de antichitât, a coventavin i vassiei, opare dal botâr. La bote e veve, e inmò cumò e à, une part impuartante intal procès di vinificazion. Tal Museu de Civiltât dal Vin si puedin amirâ e cognossi no dome che lis tecnichis pe 'costruzion' di une bote, ma ducj i struments che a coventin par fâle: des breis ai imprescj par slissâ par dentri lis botis.
No mancje la ricostruzion di une ostarie tipiche furlane, là che si pues amirâ la racuelte particolâr di misuris antighis di ostarie e al è pussibil tornâ a cerçâ la atmosfere di une volte. La ostarie furlane, ricostruide in maniere minuziose, i permet al visitadôr di sintî l'ambient dulà che si cerçave il vin e, par solit, si cjatave alc di mangjâ, si zuiave di cjartis o di more.