Il percors espositîf al è il risultât de ricercje archeologjiche fate in ocasion dal restaur architetonic e de sistemazion dal edifici  dopo dal taramot.

Il percors presentât in secuence cronologjiche al è stât concepît in mût di presentâi al visitadôr lis cognossincis di fonde su la storie dal edifici sacri.

Prime dal sgjâf e des ricercjis, lis notiziis di chest lûc dispès si messedavin cun tradizions e liendis nassudis intai secui de fantasie popolâr.

La presince umane sul cuel di Cesclans e je confermade za dai prins secui de etât de romanizazion.

No si rive ancjemò a savê ce gjenar di insediament che al fos (residenziâl, fortificât, di cult), stant che a son stadis cjatadis pocjis olmis.

Prime dal edifici sacri cristian e jere une struture funerarie, une tombe monumentâl (mausoleu), datade a epoche tarde antighe, secul IV-V. E jere destinade a un personaç che no cognossin ma che al veve di jessi di classe alte e e podeve jessi mete di pelegrinaçs. Po dopo la tombe e je stade abandonade e il spazi distrut di plante fûr.

I rescj sorevivûts a son presentâts insiemi cui rescj di un scheletri: l'ultin “abitadôr” medievâl dal sepulcri.

La prime glesie di Cesclans e je stade tirade sù no prime dal secul VIII-IX, al è l'edifici cuntune tor di jentrade. Al è significatîf che la tor e sedi stade tirade sù propit parsore dai rescj de tombe di chel personaç impuartant di ete tarde romane.

Al pues jessi che cheste Glesie e fos munide di cente fortificade, che i si poiavin cuintri cjasis e magazens. Si tratave, duncje, di une glesie-cjistiel, buine di dâ protezion ae int dal teritori tal câs che al coventàs.

Dilunc dal secul XII, la Glesie e je stade slargjade e furnide, a Est, di trê absidis semicircolârs. Si pues pensâ che chest al sedi sucedût par opare dai paris benedetins. Di fat, intal 1119 la plêf di Sant Stiefin e comparìs inte liste dai possediments de badie benedetine di Mueç.

Plui o mancul 28.000 framents di stabilidure frescjade a son comparîts dilunc dal mûr perimetrâl Sud e a Est de abside centrâl de glesie cu lis trê absidis: a son ce che al reste de decorazion parietâl di diferentis epochis.

Al è stât cjatât fûr ancje un spazi, che al da di maravee no dome pe sô conservazion otime, ma ancje pal misteri de sô funzion. La ipotesi plui increditade e je che e fos une dispense di mangjative, di proprietât de comunitât de plêf, par tignî sigure la robe di lâ a cjapâ intai moments di dificoltât o par tignî lis ufiertis in nature