Il complès di Vile Manin di proprietât de Regjon autonome Friûl - Vignesie Julie, al è un dai monuments artistics plui significatîfs de regjon, e ancje un dai simbui plui cognossûts dal turisim e de culture regjonâl. La vicende secolâr, la grandiositât e la sugjestion dal insiemi cul leam strent de part edificade cul zardin storic, a contribuissin a fâ cheste residence l'esempli plui significatîf de civiltât di vile venite in Friûl.

La Vile, che e à cognossût moments di splendôr prime de fin de Republiche di Vignesie e cun cheste dal ultin Dôs, Ludovì Manin, e deventà po dopo cuartîr gjenerâl di Napoleon Bonaparte e al è propit chi che al vignarà firmât il “Tratât di Cjampfuarmit” che al fissave la fin de potence secolâr di Vignesie (ai 17 di Otubar dal 1797). Il zardin storic, cui siei 18 etars di teren, al è calcolât chel plui impuartant de Regjon, che al cjape dentri tra chês altris, esemplârs di plantis secolârs.

Lis sedis museâls stabilis de Vile a son la stanzie des carocis, cuntune desene di esemplis di carocis antighis, e la armarie antighe cun armis che a vegnin di ducj i continents. Di diviers agns il cuarp nobil de Vile al è sede di esposizions temporaniis.

Il palaç dal Sietcent al ospite intes sôs stanziis mostris preziosis di respîr internazionâl che si metin dongje a chês di caratar locâl e teritoriâl.

La ricjece des stanziis e impreziosìs lis oparis in esposizion e ur da une colocazion juste e degne. Intai grancj spazis esternis de Vile a vegnin organizadis ogni an tantis manifestazions, concierts, spetacui e intratigniments cun caratar culturâl e turistic di grant nivel.