Al à aderît ae Rêt Museâl Provinciâl 

La struture espositive e nas de esigjence di conservâ e valorizâ il patrimoni impuartant pai aspiets paleontologjic, storic e etnografic che al è tal teritori.

Il Museu dal Teritori al acompagne i visitadôrs intun viaç straordenari intal spazi e intal timp, par scuvierzi piçui grancj tesaurs tignûts a Dogne e tal so cjanâl straordenari.

Al ospite trê sezions: chê paleontologjiche, chê storiche e chê etnografiche.

La sezion paleontologjiche, a plan tiere, e je dedicade ae scuvierte impuartante des pistis fossilis di un retil predadôr dal Triassic: il Fitosaur.

Il percors espositîf si disglagne su trê salis: une propit paleontologjiche, une sale polifunzionâl/laboratori e une specifiche dedicade ae scuvierte di Dogne.

La sale paleontologjiche e mostre la lastre di cret cjatade fûr in Cjanâl di Dogne intal 1994, là che si individuin lis olmis fossilis dal Fitosaur.

La sale polifunzionâl/laboratori e ufrìs la pussibilitât di fâ ativitâts di aprofondiment e di laboratori didatic: i panei espositîfs picjâts tal mûr, di caratar gjenerâl, a son dedicâts ae gjeologjie, aes eris gjeologjichis e ai fossii; une sale specifiche, invezit, e conte de scuvierte paleontologjiche di Dogne.

La sezion storiche, che e je tes salis espositivis dal prin plan, e riclame ae memorie lis vicendis leadis al prin conflit mondiâl. Il percors espositîf, che si disvilupe in dôs salis, al acompagne il visitadôr sui lûcs de Grande Vuere: panei informatîfs, un plastic de zone di vuere precîs e detaiât, gjigantografiis di Dogne tal timp dal conflit, i ufrissin al visitadôr cjantons carateristics di vite al front. Si osservin ancje reperts interessants che a contin a plui vôs la storie de Grande Vuere.

La sezion storiche i presente al visitadôr une clâf di leture imediade dal teritori e lu acompagne a scuvierzi un percors espositîf pardabon singolâr, chel che si articole di là dal Museu: lis galariis “Le Morosine" a Mincigòs, la cjarezabile militâr, il “Jôf di Miezegnot” e il “Jôf di Somdogne” là che a restin framents ancjemò impuartants di storie.

La sezion Etnografiche, che e cjate spazi intes salis dal secont plan, e à contignûts leâts ae realtât storiche, sociâl e ambientâl di Dogne e al ricuart dal pitôr di Dogne Fred Pittino.

Il percors espositîf al regale ai visitadôrs une esperience che no si pues dismenteâ: un viaç straordenari inte memorie di un popul.