Il Museu de Vite Contadine “Cjase Cocel” al è la ricostruzion fedêl di une cjase contadine di une volte che, in cualchi sô part, e je dal 1600.

Il Museu al conte la vite di ogni dì di une famee de fin dal 1800 fintremai al 1950: prime dai grancj cambiaments sucedûts in Friûl, inte vite e intal lavôr, dopo dal 1960.

Il non al è riferît ae famee Chiarvesio, che di stranon a vevin Cocel, che par tancj agns e à vivût te cjase che vuê e je ricostruide e destinade a ospitâ il museu.

Il visitadôr al à, a colp, la sensazion di cjatâsi intun lûc vîf: une cjase dulà che e je int a stâ e dulà che il timp si è fermât. Dentri a son stâts ricostruîts in maniere fedêl cierts ambients e tra chei la cusine, lis cjamaris, la cantine, il blavâr, la arie, la stanzie di lavôr.

Si pues vivi di gnûf la vite di une volte, ancje in graciis de presince des personis che a fasin variis lavorazions cun imprescj antîcs: o podìn cjatâ a vore il gue, il zeâr, il fari, la filandere e lis ricamadoris di pontine.

Cun cure particolâr, sedi pe ricostruzion filologjiche sedi pe ricostruzion storiche, al è stât realizât, in bande de cjase, il broili, un piçul fonts là che a son stâts tornâts a meti un filâr di morârs, che a coventin pai cavalîrs, i filârs di vîts cun ue tipiche de viticulture furlane e l'ort.

A son stâts ricostruîts altris ambients: sot di une lobie e je la machine di bati il forment, che e funzione ancjemò, po dopo a son un mulin e une farie.

Une gnove ale e ospite al plan tiere la ricostruzion di une ostarie furlane, che i siei furniments a vegnin di ostariis vieris di chenti, e la latarie, ancjemò in vore, dulà che e je fate la lavorazion dal formadi cul sisteme des cjalderiis “a fûc mobil”.

Tal prin plan, parsore de ostarie, e je stade riprodote in maniere fedêl une aule di scuele di une volte e tal secont plan e je stade preparade une sezion dedicade ae apiculture.

Une part de gnove costruzion e je stade ideade tant che document di tecniche aromai sparide, e je stade ricostruide dome pai fins dimostratîfs e didatics: la tecniche di fâ i cuvierts cu la paie di siale, che fin ai prins dal 1900 e jere doprade tai nestris paîs.

Difûr il scuviert al è destinât aes ativitâts artesanâls e pe vite sociâl, spazi fondamentâl inte societât di une volte.

Chest spazi al è parât di un mûr une vore biel di clap che al cor dilunc de la strade.

A Feagne, ae fin dal secul passât, si invie une ativitât artesanâl di grande impuartance sociâl: la Scuele di Pontine (lavorazion cun tombul e fusei) par opare de contesse Cora di Brazzà e dal senatôr Gabriele Luigi Pecile.

Il visitadôr al pues viodi ricostruide in maniere fedêl la Scuele di Pontine di Feagne, lei la storie traviers fotografiis, documents e manufats di chê volte, amirâ lis ricamadoris di pontine a vore. La iniziative de scuele, di là di jessi une vore vantazose pes zovinis di Feagne di in chê volte, che a cjatavin une ocupazion reditizie e dignitose, e à mostrât in curt di fâ nassi espressions artistichis di grant interès, stant che i manufats des fantatis a son lâts ben di là dal zîr locâl, tant di concuistâ il rafinât mont feminin di un timp là che lis pontinis e i ricams a jerin un motîf di mode e di lustri, tant che lis pontinis di Feagne a rivarin fin ae cjase reâl e chestis ricamadoris di pontine a àn concuistât il titul di “ricamadoris di pontine de Regjine”.

La scuele e à vût vite vivarose fin tor dal 1950 e e à sierât, par une serie di mudaments sociâi e economics, tor dal 1960.