Al à aderît ae Rêt Museâl Provinciâl
A Forgjarie, dentri dal Palaç dal Municipi, e je une Mostre permanente sul materiâl archeologjic cjatât intai sgjâfs dal Çuc Scjaramont.
Lis scuviertis a son di une lungje dade di timp che e va dal secul IV p. di C. fin al secul XIV d. di C., cuant che e je stade la distruzion dal Cjistiel.
Di là de Mostre si pues visitâ la aree dai sgjâfs trasformade in Parc Archeologjic. Chest al è dividût in doi setôrs, e al è realizât par ricostruî e sclarî il procedi e l’evolvisi de vite e dal sît dilunc dai secui.
Il Çuc Scjaramont, al è stât abitât dal sigûr in maniere continuative par motîfs strategjics e di sigurece, stant che al controlave il lunc toc di val che di Osôf al puarte al mâr e il toc finâl dal cjanâl dal Arzin.
Lis primis scuviertis sul cuel a son dal secul XIX, ma al è stât dome dopo dal taramot dal 1976 che a son scomençât i sgjâfs archeologjics, di mût di cjatâ fûr tantis struturis, ogjets e materiâi. A son propit chescj ultins a costituî la mostre: plui di un precîs monedis, fibulis, imprescj varis, framents di crep, cualchi zoie e armis. La esposizion e scomence di une descrizion complete dal sît; si passe ae “Vite dal Çuc” cu la division in cuatri periodis: Preroman, Roman, Postroman e Alt Medievâl, Medievâl e Rinassimentâl. Si ilustrin i prins abitants dal Çuc in etât preromane, cuant che si è formade une vile fortificade che e controlave il passaç di bestiis e fier che des Alps al leve al Alt Adriatic. Al è ancje presint il Murus Gallicus, unic esempli di fortificazion di gjenar celtic (II-I secul p. di C.), individuât inte riviere alpine meridionâl, e che cumò si pues viodi intal IV setôr dal sît archeologjic.
Po dopo al è descrit l'”Insediament Militâr” in etât Romane, che al è stât tai timps di Juli Cesar tra il 58 e il 51 p. di C., dopo dal sac di Tergeste (Triest) de bande di popolazions barbaris, fin che al è stât abandonât, il “Cjistiel”, la “Glesie“ in etât postromane e medievâl.
I tocs che si viodin te mostre a son di grant interès, tra chescj la atenzion e cole suntun ogjet singolâr che i disin Lynx, un strument musicâl che al busine cuant che si lu fâs zirâ, fat di vues (metatars di piore), che al è dal IV secul p. di C. e che al jere doprât par rituâi e magjiis.
La mostre e espon ancje, di là di tancj ogjets, dôs monedis splendidis e une sezion di framents di ceramiche grese di etât preromane.