Il Centri visitis dal Parc Naturâl des Dolomitis Furlanis a For Disot al è organizât su doi plans dal fabricât devant dal municipi.

La esposizion e da dongje materiâi e reperts didatics par divulgâ la cognossince de realtât naturalistiche dal Parc e plui in gjenerâl dal rapuart om-bosc.

L'obietîf al è di permeti al visitadôr di cognossi lis particolaritâts che a fasin dal teritori un ambient degn di jessi protet.

La esposizion dal Centri visitis di For Disot e rapresente 'tal sierât' l'ambient forestâl che si pues cjatâ fûr passant pai trois dal Parc e plui in particolâr e disvilupe e e ilustre chescj argoments: lis carateristichis fisiologjichis des plantis, lis tipologjiis e speciis forestâls presintis, i gjenars di teren, lis tecnichis di implei forestâl di une volte e di vuê, al è ancje disponibil pai visitadôrs un piçul laboratori didatic dotât di stereoscopis, une salute par proiezions e zûcs interatîfs.

Il percors didatic al è organizât in sezions dedicadis al aprofondiment dai diviers argoments.

Une sezion e rapresente lis carateristichis fisiologjichis de plante, cu la rapresentazion grafiche des funzions fisiologjichis e il percors de linfe.

Une seconde sezion e conte de evoluzion dal bosc e e presente un scheme evolutîf dal bosc dal teren nût al bosc madûr.

Il percors al va indevant descrivint lis tipologjiis boschivis cu la individuazion dai diviers gjenars di plantis che a son intal teritori e des carateristichis dal teren.

A son descritis lis speciis principâls di arbui che a son intal Parc e ilustrâts diviers esemplârs cu lis lôr pomis e lis lôr fueis.

Lis ativitâts didatichis a son rapresentadis de esposizion di sezions di troncs des speciis cjapadis in considerazion. A son ancje a disposizion stereoscopis par osservâ i reperts naturalistics.

Cun di plui cul Centri visitis al è colegât un percors interessant che al va sù dilunc de Poscjadee, dulà che e je la ricostruzion di une vecje teleferiche. E je un manufat ricostruît in maniere integrâl e fate cussì cemût che e jere fin ai prins agns dal 1960. E je une opare significative di 'archeologjie forestâl', une parinte drete des teleferichis di cumò, che une volte si doprave par puartâ jù il len taiât intai boscs plui lontans e erts.

La Teleferiche de Val de Poscjadee e je in funzion pes ativitâts leadis al Centri visitis dal Parc di For Disot, ma e jude ancje a favorî la silviculture e a puartâ jù i lens doprâts de int dal paîs.

La visite al Centri e permet di cognossi ducj i aspiets forestâi dal Parc Naturâl des Dolomitis Furlanis.