Al à aderît ae Rêt Museâl Provinciâl 

La Congregazion des Muiniis Francescanis Missionariis dal Sacri Cûr e je stade fondade a Glemone de duchesse parisine, Laure Leroux de Bauffremont, che di muinie e veve non Mari M. Giuseppa di Gesù (1832-1917), e dal religjôs francescan minôr Pari Gregorio Fioravanti (1822-1894) di Grotte di Castro (Viterbo). Intal 1859, a Vignesie, la Duchesse i à dite al Pari di volê fondâ a un Istitût di Muiniis Terziariis Francescanis par istruî lis fantatis puaris e judâ tes Missions. Pe sô devozion particolâr a Sant Antoni, Pari Gregorio al à sugjerît che l'Istitût al nassès a Glemone, sede di un Santuari dedicât al Sant Taumaturc. Pe gnove fondazion al è stât sielt l'ex Munistîr di Sante Clare, soprimût di Napoleon intal 1810.

Vuê ciertis parts dal Convent a son stadis trasformadis in Museu.

Il percors dal Museu des Muiniis Francescanis Missionariis dal Sacri Cûr si articole in sezions che a rimarchin lis tapis fondamentâls de storie de Congregazion, ma ancje la vite di ogni dì des religjosis impegnadis a puartâ di ogni bande dal mont il messaç francescan.

L'element che al caraterize la esposizion e je la imagjin dal Convent cemût che al jere prime dal taramot dal 1976, par ricuardâ che l'avigniment dramatic al è rivât a butâ jù l'edifici, ma no la fede che e animave lis Muiniis, la lôr volontât di judâ il prossim, di deventâ strument di pâs. Il visitadôr al scomence il so viaç inte storie osservant materiâi preziôs che si riferissin ae presince des Clarissis a Glemone, soredut la icone che e figure la Mater Admirabilis.

Po dopo e je la sezion dedicade ae Fondadore: Mari Giuseppa di Gesù, duchesse di Bauffremont, femine rafinade e culte. A son esponûts documents eterogjenis di grant interès par piturâ la personalitât complesse de nobildone francese: i ritrats di cualchi so familiâr, insiemi cu la documentazion de ricercje interiôr, dal bisugn di dâ rispueste, cu la religjon, aes grandis domandis esistenziâls. Plui indevant si fermisi sul incuintri fondamentâl cun Pari Gregorio, che al deventarà so colaboradôr inte fondazion dal gnûf Istitût e che al veglarà su lis Muiniis cuant che la Fondadore e lassarà Glemone par tornâ a lâ indevant cu la sô esistence sofierte, che si è concludude tancj agns dopo a Montecarlo. Dal Fondadôr, Pari Gregorio, a son esponûts ogjets che a testemonein la esperience cuotidiane, ma soredut la fede profonde, la preparazion filosofiche teologjiche, la dedizion assolude, la viertidure al impegn missionari che lu sburtarà, dome cuatri agns dopo de inaugurazion dal Istitût, a inviâ lis Muiniis in Americhe.

La prime sale e mostre part dal rivistiment di len origjinari che al furnive tancj ambients dal Convent vieri. Tal mieç, intun espositôr, a son dâts dongje ogjets di grande impuartance che a son des origjins de Congregazion: un crucifìs di len di grande intensitât espressive e la statuute de Imaculade, intune cun cualchi taule dal progjet pal Convent, cun ogni probabilitât dissegnât daûr des indicazions de Fondadore stesse. Inte seconde sale la atenzion ae va su lis 'primis' Muiniis: i regjistris, i libris dai acuiscj, ma ancje i cilicis e i rosaris, segns di preiere e di pinitince, che a testemonein il passâ dai dîs.

La tierce sale e ricuarde lis tapis seguitivis de ativitât apostoliche: de esperience dal Coleç e de Scuele di Glemone ae Mission americane e a chê orientâl.