La colezion des Motos storichis di proprietât dai fradis Umberto e Flavio Nigris, e nas intal 2000 de lôr passion pes 'dôs ruedis'.
In mostre a son plui di 170 esemplârs di motos storichis di produzion taliane, fatis di cjasis motociclistichis impuartantis tra i agns 1950 e 1970.
La invenzion de motociclete e ven assegnade al inzegnîr francês Louis-Guillaume Perreaux che al à depositât un brevet intal 1869 e che al à fat un veicul a dôs ruedis che al leve a vapôr.
La prime motociclete cun motôr a combustion e je stade fate di doi inventôrs todescs, Gottlieb Daimler e Wilhelm Maybach, che a àn prodot il prin prototip, intal 1885, intune oficine intai contors di Stuttgart.
Prime de fin dal secul XIX i prins esemplârs che a funzionavin a son stâts metûts in vendite e di chel moment e je stade une evoluzion continue de motociclete.
Tant che inte storie paralele de machine, il mont des motocicletis al è lât simpri parie cun chel des competizions. Se i prins modei di motocicletis costruîts a jerin dome che bicicletis cun tacât sù un motôr, la evoluzion tecniche e estetiche e je stade simpri continue, e cussì al è stât pal distanziament progjetuâl cu lis dôs ruedis a propulsion umane.
Za intai prins decenis dal secul XX si viodevin i prins esemplis di sospension par che la marcje e fos un pôc plui comude.
Fin tal 1970 la produzion e jere pe plui part europeane, cu la industrie britaniche, todescje e taliane devant di dutis.
Cul lâ indevant de specializazion e de tecniche lis tipologjiis si son slargjadis simpri di plui cul timp e sul marcjât dal dì di vuê si pues cjatâ une sdrume di gjenars diviers.
La ripartizion di tipologjiis e pues jessi fate tra lis dôs ruedis progjetadis e costruidis pal ûs propit stradâl, a chês specifichis pai grancj viaçs fin aes replichis di chês dopradis intes competizions di velocitât su piste; la seconde tipologjie e je chê rapresentade des motos che si puedin doprâ in fûrstrade.
Ancje par cheste seconde tipologjie la sielte e je tant grande, tacant des replichis dai modei doprâts intes competizions.
La colezion Nigris e je componude prin di dut di motocicletis dal gjenar stradâl e scooter, costituide des cjasis plui famosis che a àn prodot chestis motos; si podaran cjatâ, tra chei altris, diviers modei Bianchi, Piaggio, Gilera, Guzzi, Ducati, Parilla, Innocenti, Benelli, Laverda, Guazzoni e Morini.
Lis motocicletis, no dome a son conservadis, ma cierts modei a son stâts comedâts. E je stade fate une sielte, cierts modei a son stâts conservâts tant che reminissence di vecjis gloriis, altris, invezit, a son stâts comedâts par conservâ il valôr storic e lis soluzions tecnologjichis di chê volte.