La contesse Giuditta de Claricini, prime de sô muart e istituìs la Fondazion de Claricini Dornpacher pe gjestion di ducj i siei bens e pal mantigniment de vile che e puarte il so non; cheste e je calcolade tant che une cjase di stîl venit tipiche dal Friûl Orientâl.
Dut il complès edilizi, che si pues datâ plui o mancul tor dal 1650, al cjape dentri la cjase dominicâl, un curtîl di onôr devant de façade principâl e une cort de bande diestre, biele largje là che si cjatin la barcjesse e lis dipendencis rustichis.
Par daûr, a Sud dal edifici, si pues viodi un dai zardins talians plui biei dal Friûl costruît sui prins dal Nûfcent cuntun paviment centrâl di piere che al divît in simetrie areis verdis inricjidis di plantis di bos, vâs di limonârs, fontanis e statuis.
Di là di une balustrade si slargje un parc boschîf formât di grups di arbui, cualchidun secolâr, tant che faiârs, eliçs, cedris, peçs e pins neris.
Dogje dal edifici principâl e je la capele nobiliâr dedicade ae Sante Crôs, componude di une aule retangolâr cuntun altâr preziôs di marmul intarsiât. La sô costruzion e je di dopo de vile: lu testemonein lis carateristichis internis e esternis che a rimandin a stilemis tipics dal 1700 confermâts ancje dai furniments internis e di cualchi opare, par esempli dôs pituris dal pitôr di Vençon Lucio Cjandit.
Par volê de contesse Giuditta, la Fondazion e à il compit di conservâ ducj i furniments de vile: une grande colezion di cuadris, mobii, stampis, libris, tiessûts e ricams antîcs.
La mobilie e je di assegnâ a un periodi che al va dal secul XVIII e al secul XIX: tra lôr a risaltin cuatri bancjis dal prin Sietcent cun piture dorsâl che lis sôs decorazions a son assegnadis al Chiarottini, (1748-1796); si cjate un tinelut Stîl Imperi e il furniment de sale di gustâ, opare assegnade ae buteghe dal intaiadôr e scultôr Matie Deganut (1712-1749).
A son plenis di incjant ancje lis puartis dal salon centrâl dal prin plan, ornadis cun senis di cjace e motîfs campagnûi riferibii ae seconde metât dal Sietcent. La part plui considerevule di dute la colezion e je cence dubi chê dai cuadris. Tra lis oparis pitorichis preziosis o ricuardìn sîs ovâi cun senis mitologjichis e senis di storie sacre assegnâts a Giacomo Carneo (1660-post 1731); al è dopo un ritrat sublim di Jacum Claricin assegnât a Sebastian Bombel, e une serie di naturis muartis di Paolo Paoletti (1671?-1735).
Di pôc la racuelte e je stade inricjide de donazion di un bon numar di cuadris dal pitôr Guido Tavagnacco (1920-1990) che si puedin viodi intal salon de barcjesse. La vile e à ancje un archivi privât preziôs e une grande biblioteche.