I tesaurs de Plêf di Guart a son conservâts, di cualchi mês, li di une gnove sede museâl: e je stade ristruturade, di fat, la vecje latarie da pît de Plêf.

La Plêf di Guart, dedicade a Sante Marie, e je une glesie che si cjate a Negrons, frazion dal comun di Davâr. Al è l'edifici religjôs principâl, Plêf Prepositurâl, Glesie Mari dal Cjanâl di Guart.

Un edifici basilicâl primitîf dal cjanâl, che i siei rescj a son stâts cjatâts di sgjâfs archeologjics li de gleseute medievâl di Sant Martin a Davâr, al jere dal principi dal V secul d. di C., plui viers la planure e, dal complès, al faseve part ancje un batisteri di plante poligonâl.

Po dopo la sede de Glesie di Guart  e je stade trasferide sul cuel dulà che cumò e je la Plêf, intun lûc 'plui sigûr' dulà che salacor al jere il cjistiel di Negrons, ricuardât des cronichis vieris.

La testemoneance documentâl plui antighe de esistence de Plêf di Guart e je dal 1119, cuant che e je stade assegnade ae jurisdizion de badie di Mueç e il titul di plevan di Guart al è stât assegnât al abât di Mueç.

Dilunc de Ete di Mieç la Plêf e je stade la uniche parochie dal cjanâl, cuntun teritori che al cjapave dentri chel che vuê al è sot dai comuns di Davâr, Comelians, Prât, Rigulât, For di Avoltri, Sapade, Ravasclêt e Çurçuvint. Tacant de tarde Ete di Mieç si son distacadis un pôc a la volte de Plêf Mari variis parochiis, tacant di chês plui lontanis.

La glesie, vuê, e à l'aspiet di une basiliche di trê navadis cun presbiteri a plante cuadre, cun dongje dôs sagristiis: l'aspiet di cumò al derive di une ricostruzion dal Sietcent, ma a restin segns clârs des fasis architetonichis di prime.

Dentri a son trê altârs dal Sietcent. Sul altâr maiôr, comissionât intal 1762, a risaltin lis statuis di marmul dai sants martars Zuan e Pauli.

L'altâr di diestre, comissionât intal 1771, al à une statue dal votcent de Vergjine dal Rosari.

L'altâr di çampe, comissionât intal 1757, al à une pale che e figure Sante Eline.

Prime dal restaur dal Sietcent, la glesie e je stade cambiade, sot de direzion dal mestri Simon di Mene, dopo dal fûc dal 1431: tal mûr meridionâl si note la sacume di une monofore gotiche che si pues assegnâ a chest intervent.

Dilunc di restaurs fats dopo dal taramot dal 1976 a son vignûts fûr cordui e clâf di volte gotiche che a jerin dai edificis di prime.

Inte Plêf e je stade prontade, za dal 1973, une piçule realtât museâl par ufrî une testemoneance di caratar archeologjic, storic, artistic e religjôs su la Plêf di Guart.

Il Museu al è intun edifici da pît de Plêf e si articole intun piçul itinerari traviers lis bachechis espositivis e lis diviersis testemoneancis.

Il repert plui antîc al è la “Lavare di Cjanaie”: frament di lapide preromane cun iscrizion ancjemò no decifrade, cun caratars etruscs setentrionâi o venetics.

E je stade cjatade su chê che e jere stade za la piste preistoriche che di Raviei (Cjanâl dal Tiliment) e menave in Guart, passant propit sot dal cuel de Plêf.