Cheste colezion e je ispirade dal compositôr Wolfgang Amadeus Mozart di Salisburc, il mestri Giovanni Canciani, proprietari di cheste colezion straordenarie, al à trasformât la sô cjase in cjase museu cul non di “La Mozartina”. Cheste cjase di Paulâr, e veve non cjase Scala, de famee che le à fate tirâ sù tal 1745. La ristruturazion, dopo i dams dal taramot dal 1976, e à rispietât la architeture origjinarie des cjasis cjargnelis antighis e e ospite cumò la colezion privade dal mestri.

La Mozartine e je in sostance une racuelte di struments musicâi antîcs e modernis, e no dome, e cjape dentri ancje tantis colezions di libris antîcs, di cuadris, di ogjets di une volte e di ducj i furniments tipics cjargnei dal Votcent, ma ancje aparaments sacris e un spartît manuscrit autentic dal Votcent di une composizion mozartiane.

Il lûc di origjin dai ogjets al è in sostance la aree cjargnele, ma a son ancje tancj tocs dâts dongje te lungje permanence piemontese dal mestri, e a son ancje la balalaika russe e un strument african.

Cheste e je une racuelte particolâr e di grant lustri, il risultât di une ricercje durade dute une vite, che e fâs pensâ ai colezioniscj dal secul XVIII e XIX, dulà che ogni ogjet al è preziôs, cence tignî cont dal so valôr monetari.

E je straordenarie la atmosfere che si respire in cheste cjase museu, stant che chest al è un lûc vîf: tal ultin plan, il mestri al da acet a amîs e ospits e dispès al organize incuintris musicâi, piçui concierts, e i siei struments a tornin a vivi une altre volte.

Fin dal 1955 a puedin jessi visitis vuidadis par apontament, che a permetin di amirâ i struments musicâi e intal stes timp di scoltâ lis sonoritâts e i timbris in graciis des esecuzions estemporaniis dal mestri stes.