Al à aderît ae Rêt Museâl Provinciâl 

A Samardencje, lûc de scuvierte dal sît di epoche Neolitiche plui grant in Italie, e ancje sît archeologjic fra chei plui impuartants di Europe, di desenis di agns ogjet di studis e ricercjis 'sul cjamp' al è nassût il Centri Visitis Storic Archeologjic.

L'obietîf de viertidure dal Centri al è chel di valorizâ e divulgâ lis scuviertis impuartantis su la preistorie furlane e par chest motîf la esposizion e je stade prontade in mût di costituî un bon mieç didatic par fâ cognossi cheste realtât locâl ai fruts.

Il Centri si propon tant che percors inmagant di scuvierte de Preistorie e dal Neolitic furlan, e al è ripartît in doi moments.

Il prin al è la visite vuidade ae esposizion dal materiâl storic archeologjic, che al permet ai visitadôrs, acompagnâts des esplicazions, di rivivi la Preistorie cu lis ambientazions sugjestivis, la osservazion dai reperts e la manipolazion des ricostruzions perfetis dai manufats antîcs; il secont al previôt i laboratoris di archeologjie sperimentâl, un moment fondamentâl là che al devente protagonist il 'savê fâ', intun confront stimolant cu lis tecnologjiis plui antighis che a varan di jessi imparadis e dominadis par riprodusi ogjets e manufats cun metodis che si somein plui che si pues cun chei preistorics origjinâi.

Il Centri visitis al permet di tornâ indaûr inte Preistorie, cui plastics sugjestîfs che a ricostruissin i ambients neolitics e lis riproduzions apassionantis che si puedin 'tocjâ cu lis mans': un mût inovatîf e zovevul di fâ didatiche, là che nol è impuartant dome scoltâ par imparâ, ma si pues propit tocjâ, par imparâ il nestri passât plui antîc.

Tocjant lis riproduzions di struments antîcs si scomence la cognossince de Preistorie. Si pues capî i contignûts plui insot e cun plui completece tai dai laboratoris didatics, inovatîfs e apassionants, di archeologjie sperimentâl, dulà che si jentre dal dut intes ativitâts plui diviersis che a coventavin par sorevivi e si torne a fâ, doprant tecnichis origjinâls, manufats Preistorics e Protostorics.

Si sperimente, dal periodi Neolitic, la riproduzion de piture rupestre cun colôrs, struments e tecnichis origjinâls, si impare a fâ vistîts e piçui contignidôrs cusint la piel, si prove a fâ imprescj e manufats doprant e instreçant lis fibris vegjetâls.

Si impare, dal periodi Neolitic, la manipolazion de arzile par fâ contignidôrs e statuutis di arzile decorâts daûr dal gust di chê volte; si capìs cemût lavorâ te maniere juste la lane e doprâ un telâr primitîf par tiessile, si impare a fâ il pan neolitic doprant muelis e pestei par trasformâ lis semencis inte farine che e covente par impastâ e cuei fuiacis integrâls cetant profumadis.

Si fâs ancje la ativitât di sgjâf archeologjic simulât, là che si impare cemût che al lavore l’archeolic e ce mistîr dificil che al è il so; si imparin tecnichis e metodologjiis par cjatâ i sîts archeologjics, si capissin e si aplichin lis variis tecnichis di sgjâf e dopo la interpretazion dai reperts recuperâts, intun laboratori pratic che al apassione.