Il Centri Visitis “Vilaç dai Ors” logât a Stupize dentri dal sît di impuartance comunitarie dal foran dal Pradolin e Mont Mie, al è il pont di partence par escursions tai sîts dal torint Legrade, dal foran dal Cuarnap, dal Riul Blanc di Taipane, Grant Mont e dal Mataiûr. Li dal Centri Visitis " Vilaç dai Ors” si impare a cognossi l'ors e chei altris grancj carnivars tant che linçs e lôfs che a vivin tes zonis plui salvadiis e sugjestivis dal Friûl e de Slovenie.
Inte sale multimediâl a son proietâts i videos des caturis, dome par fins di studi, dal ors e dal linç; imagjins 'robadis' in nature di chescj animâi maraveôs. Une mostre e pant i segrets dai struments di ricercje.
Un arboretum al permet di imparâ a distingui lis plantis plui preseadis dal grant plantigrat. Pai fruts plui piçui e je preparade une aree di zûc ispirade aes abitudins di vite dal ors e dal linç, dulà che a podaran ancje simiotâ i lôr moviments, e dulà che si pues, cun di plui, esplorâ e visitâ la ricostruzion di une cove dal ors. Cun di plui, fruts e grancj a podaran imparâ divertintsi cu lis ativitâts multimediâls e cui laboratoris creatîfs.
Dal Centri visitis al partìs un troi tematic “daûr des olmis dal ors… e di altris abitants dal bosc”, dulà che si puedin visitâ ricostruzions di sîts di ricercje e di olmis di ors, linç e altris animâi.
Un troi naturalistic vuidât al mene intal sugjestîf Cjanâl di Pradolin, fin ae bocje di Pradolin al confin cu la Slovenie intun percors comut e facil, plen di flore, faune e di segns di presincis rurâls, rescj di paisuts bandonâts a Pedrobac e Pradolin, cu la pussibilitât di rivâ a pît tal paîs di Podbela in Slovenie.