A Sant Zuan dal Landri, in comun di Pulfar, a son intune il complès storic monumentâl e il biel percors soterani: une sintesi maraveose de storie, de art, de culture e des ricjecis naturâls des Vals dal Nadison.

Si jentre lant sù par une scjalinade di plui di cent scjalins, pe bocje dal landri che si vierç intal cjanton formât di dôs parêts di cret ben altis, che a fermin tant che par magjie lis mil sfumaduris di vert dai boscs, rots ca e là di prâts e cjamps, fin su lis rivis dal Nadison, cu la sô aghe colôr di smeralt.

Fin de preistorie l'om al à doprât chest lûc riparât e cun tante ricjece di aghe tant che abitazion e difese, intervents seguitîfs a àn cancelât, magari cussì no, i segns di chei prins insediaments. A son stâts i Romans a fâ chi une postazion militâr, colegade cul Vallum Alpium Iuliarum e cul sisteme difensîf di Cividât. Salacor a faserin ancje un lûc di cult dedicât a divinitâts leadis al mont soterani o ai boscs. In ete bizantine/langobarde a son stâts fats sù doi lûcs di cult: la capele de "Sacrata Vergine Antiqua", dedicade ae Madone cereole, dismantelade dilunc dai ultins doi secui, ancje se a restin ancjemò cierts elements architetonics interessants di chê volte, e chê di Sant Zuan Batiste, trasformade intal 1477 in stîl tart gotic dal mestri costrutôr sloven Andrej di Cekofja. La sô 'firme' cu la date di costruzion, in caratars gotics elegants, si cjate a diestre de jentrade: "Maister Andre von Lach 1477 - Jacob". Chest ultin al varès di jessi il non dal scultôr des figuris carateristichis des gjocis di piere che a tegnin sù lis semicolonis che si incrosin inte volte.

La capele e conserve segns di afrescs dal secul XVI e dissens simbolics, dal sigûr antîcs, ma dificii di interpretâ. Za par antîc il landri di Sant Zuan al è stât mete di tancj pelegrins e lûc di ritîr di eremitis e penitents. Un di chescj al varès di jessi stât chel Feliç, che la sô lapide funerarie, scrite par latin, si cjate tal mûr diestri de capele. Altris a assegnin la scrite al destinatari de donazion, che tal 888 il re Berengari al faseve par dâ al diacun Feliç la aministrazion de glesie dal Landri e dai siei larcs possediments intes Vals dal Nadison.

Par dute la ete di mieç il landri al è stât un puest di vuaite e di difese, colegât 'a viste' cun Madone di Mont e a altris ponts strategjics, dulà che vuê a son gleseutis votivis tardis gotichis.

Pe sô inespugnabilitât lu àn clamât "Fuartece dai Sclâfs".

Salacor il complès monumentâl al è stât ancje lûc di fermade di pelegrins che a levin in visite ai lûcs sants di Rome e Jerusalem cemût che a testemonein cierts simbui piturâts tal mûr di cret e che si puedin assegnâ a ordins cavalarescs. Ae fin dal '600 il scultôr Jernej Vrtav di Cjaudistrie, un artist fertil che al à lassât oparis similis in altris glesiis des Vals dal Nadison, al à fat l'altâr 'dorât' metût cumò inte grande sale di jentrade de grote. Inte part superiôr a son rapresentâts la Anunziazion e la Incoronazion de Madone. Dilunc de scjalinade di piere, fate intal secul XVII, si traviodin lis ruvinis di un cjistiel medievâl distrut intal secul XV.

Il percors interni de Grote si disvilupe par cinc chilometris e al ufrìs passaçs interessants cun concrezions calcariis.