Al à aderît ae Rêt Museâl Provinciâl
Il Fuart di Cuel Roncon al faseve part de linie difensive dal Medi Tiliment, dopo il trasferiment di proprietât dal demani militâr al comun di rivis Darcjan, il sît al è stât recuperât e trasformât par ospitâ il Museu Fuartece Tiliment. Il Fuart al è stât fat sù, par fasis, tra il 1911 e il 1912; za i prins mês dal 1913, cuntun decret Reâl specific, daûr de propueste di chel che al jere il Ministeri de Vuere, e je stade assegnade la servitût militâr ator de fortificazion e il stes an al à vût il so 'batisim dal fûc' cun manovris e esercitazions. Intal timp tra lis dôs vueris il Fuart al è stât impleât tant che dipuesit di materiâl militâr traspuartât des casermis di Udin fin al Invier dal 1944-1945, cuant che al è stât cjapât dai partigjans. Finide la vuere il Fuart al è stât doprât pai adestraments dal esercit e intal 1989 par vie dal pericul rapresentât dai slacs e de instabilitât des struturis al è stât lassât in maniere definitive. Il lavôr di recupar al è risultât di une ricercje e di une ricostruzion filologjiche dal manufat.
La opare architetoniche si presentave componude di un banc di beton no armât a doi plans, cenglât di un sisteme di fossâi a plui nivei, che di chel a devin fûr cuatri “bocjis di fûc”, instaladis in poçs a plante circolâr. Intai intervai tra i poçs, si cjatin lis “risiervutis” pes munizions e un grant coridôr di servizi. La galarie sot e acompagnave ai lozaments pai uficiâi, pe trupe, ae cjamare di medicazion, ai dipuesits di munizions.
Il progjet di recupar, al à permetût un 'gnûf' ûs dai spazis intal rispiet des carateristichis storichis architetonichis dal edifici.
I intervents a son basâts sul concet di reversibilitât e a previodin la conservazion dal Fuart tant che document storic inte forme che nus è rivade, conservant i segns dal degrât che al è stât e dal passâ dal timp, cence une ricostruzion 'sfuarçade' des parts che a mancjin.
Cussì a son stadis mantignudis lis maglis di umit su lis superficiis architetonichis, i segns lassâts tai mûrs internis dai condutôrs eletrics, des lampadis e dai sieraments. Tal plantiere a son stadis preparadis dôs salis conferencis e une esposizion permanente su la architeture fortificade de Grande Vuere in Friûl. Di cheste esposizion si capìs la impuartance strategjiche di un teritori e la imponence des oparis architetonichis militârs, in part visibilis, semenadis tal teritori dal Friûl, che no tant timp indaûr a son stadis impleadis pe difese de Italie e pal control dal teritori, storie di altris timps testemoneade di veris 'sentinelis'.