Al à aderît ae Rêt Museâl Provinciâl
La comunitât di Sauris-Zahre e je stade fondade intal secul XIII di colons che a vignivin de Austrie. Cheste origjin e je testemoneade de lenghe, un todesc arcaic, de architeture e des tradizions, ancje chês religjosis. Tra chestis e risalte, pe impuartance che e à vût inte storie de comunitât, la devozion par Sant Svualt, re e martar inglês vivût intal secul VII. Il santuari di Sant Svualt a Sauris Disot, che la sô esistence e je documentade a partî almancul dal 1328, al è stât frecuentât intai secui passâts di centenârs di pelegrins, rivâts dal Friûl e dal Venit par venerâ une relicuie dal sant, clamât soredut tant che protetôr cuintri de peste e di altris malatiis. Si capìs cussì la presince di un grant patrimoni di ogjets di ûs liturgjic e profans, donâts dai devots soredut tra il secul XVI e il secul XVIII, cuant che il santuari sauran al jere un dai centris devozionâi plui impuartants de Republiche Venite. A son conservadis ciertis pergamenis dal '400 e dal '500, che a documentin la consacrazion des glesiis di Sauris, la concession di indulgjencis a cui che lis ves visitadis, la conferme dal juspatronât popolâr, ven a stâi il dirit de comunitât di elei il so plevan, dirit esercitât in maniere formâl a Sauris fin al 1970. Par capî cemût che la val e ves di aparî ai pelegrins che a rivavin de planure al è iluminant lei lis peraulis dal “diari di viaç” di un devot di Fratute (dongje di Puart), che intal Avost 1683 al descriveve cussì la sô rivade a Sauris: «Chê vile logade tal mieç des monts, e treme simpri di frêt: al pâr che l'Invier al vivi li. Dome che il mês di Mai la tiere si scjalde; e alore a semenin i grans, siale e favis. Ae nestre rivade il forment al jere vert tant che lis favis; la siale taiade, ma cjalade dai ors, che se mangjin». Altris vetrinis a son dedicadis aes arzentariis e ai aparaments sacris, tancj di chescj ogjets a son ex voto. Une biele serie di crôs di procession, pissidis, cjaliçs, relicuiaris, cjandelîrs di arint e documente la devozion dai 'tireaur' e 'batiaur' di Vignesie, che la lôr corporazion e veve elet Sant Svualt tant che protetôr.
Une cubie di cjandelîrs e puarte il non dal donadôr (Ser Andrea da Mulla) e la date 1726. Di fabricazion veneziane al è ancje il relicuiari a ferâl dal 1600 che al conten la relicuie di Sant Svualt (un toc dal poleâr). Un relicuiari di ram dorât dal 1400, cun smalts blu e blancs, invezit al è opere di une buteghe furlane o venite, influençade dal stîl dal famôs oresin udinês Niccolau Lionel.
La presince, tra chescj ogjets, di une mostrance e di un relicuiari di divignince todescje (Augsburg) e dimostre che tra i pelegrins che a frecuentavin il santuari a jerin ancje i cramârs, comerciants che de Cjargne a levin tes Gjermaniis.
I aparaments sacris a cuvierzin une dade di timp che e va dal secul XVII al XIX. A vegnin di buteghis furlanis, venezianis, francesis e a presentin lis tecnichis principâls di tiessidure e ricam: brocatei, lampàs, damascs, rasis. Ancje pai aparaments al è pussibil assegnâ cualchi volte ai donadôrs, tant che intal câs de planete donade «da divoti veneziani l'anno 1750», o di chê cu la steme papâl e il simbul dal ordin dai Domenicans (un cjan cuntune fogule in bocje), di pape Benedet XIII e donade dal so sucessôr, Benedet XIV, midiant dal Gardenâl Camuç, che al jere lât là dal Pontefiç Massim a clamâ la indulgjence plenarie pai pelegrins che a levin a Sauris. Altris ex voto a testemonein une devozion plui 'puare' tai materiâi e tes dimensions dai ogjets, ma no mancul sintude, tant che i ex voto anatomics (braçs, gjambis) o i cuadruts di len. A son interessantis dôs telis dal 1600, che a figurin episodis de vite di Sant Svualt e a son un esempli di “ex voto viert”, stant che a lassin une striche a disposizion dai pelegrins che a vuelin meti une dediche. Al complete la esposizion un presepi dal 1700 di cere e stofe.