Al à aderît ae Rêt Museâl Provinciâl
Une cjase basse, che e je dal 1500, cul cuviert di cops che al da infûr suntune façade segnade di un portonut bugnât cul arc taront, cuatri barcons picinins butâts li disavuâi suntune stabilidure colôr auriane e, parsore de puarte, un afresc rinassimentâl cu la Madone, il Frut e i Sants. Cjase Vuarnel-Rinaldi e je cussì, ma e je ancje tant di plui. Parcè che l'edifici che, ancje al voli mancul espert, si distache de cente edilizie compate e ripetitive di vie Zorutti par une svoltade improvise dal stîl rurâl, e vâl une dople visite: tant che contignidôr e tant che contignût.
Il contignidôr, esempli ritocjât, ma râr, di residence tarde medievâl, al è soredut li, in chê Vergjine sentade in scagn cui lineaments dolçs e popolans, intai scacs blancs e ros dal paviment in prospetive, intal zûc cromatic des viestis di sant Pieri (a çampe, cun clâfs e libri) e sant Laurinç (a diestre, cun gridele e palme), opare dal mestri spilimberghês Marc Tiùs (1500-1575 plui o mancul). Il contignût, invezit, al è di une ricjece che no tu ti spietaressis intal spazi, nobil pe storie ma avonde piçul, di cuatri stanziis e un cjast.
Chi al à cjatât la sô sede l'archivi e il centri di catalogazion multimediâl di mîts, flabis e liendis di dut il Friûl. Cjase Vuarnel al è un spazi espositîf disponût su trê plans e che al cambie muse ogni volte che lu visitais. Sì, parcè che partint dal plan tiere, dulà che la tradizion si cumbine cu la modernitât inte furnide aule multimediâl, lis panariis e i jôfs par cjavai, lis pergamenis cun listis di funerâi e batisims, lis anfuris e i creps a son dome un pôcs di esemplis dai tesaurs di une civiltât rurâl. A son conservâts ancje “I gjornâi dai vîfs e dai muarts”: disesiet sfueis di pergamene, restaurâts des Maris Benedetinis di Triest, che a cuvierzin une dade di timp che e va dal 1377 al 1643, la scriture gotiche minude di nodârs e plevans che e ossile tra il latin curiâl e un volgâr che al tire sul toscan, si trate dal “catapan” di Sant Laurinç, vâl a dì il regjistri là che si cjatin notadis ereditâts e donazions dai parochians plui gjenerôs, che in cambi di messis funzionadis intai aniversaris de lôr muart a garantivin ai pastôrs di animis buinis ereditâts di forment.