Di fat la mostre e racuei bens strumentâi che a cuvierzin la dade di timp di un secul, de fin dal 1800 ae fin dal 1900 e che a documentin il lavôr manuâl dai 'gjavadôrs di Piere Piasentine'.

La mostre e descrîf dutis lis fasis di lavorazion, de estrazion e dal moviment dai blocs di piere, e po dopo ae lôr riduzion e finidure. O cjatìn esponudis jevis di variis misuris, ancje di plui di cuatri metris di lungjece, bintis, scarpei di plui fatis e dimensions, ognidun cu la sô funzion specifiche pes variis lavorazions de piere; a son esponûts ancje martiei, maçûi, macis di plui grandecis, conis di metal e di len. Al è ancje dut il furniment par uçâ imprescj, par fondiju e batiju fûr, di fat tancj imprescj che cumò a son in mostre a podevin jessi fats propit dai pichepiere.

La evoluzion tecniche e je tant interessante: risultât de inteligjence dai operadôrs e de lôr capacitât di assimilâ lis novitâts tecnichis, soredut cuant che, emigrâts tal forest par fâ chê stesse ativitât, si cjatavin devant di imprescj diviers.

La mostre e racuei sentadis particolârs, struments di misure, struments pe preparazion des cjariis esplosivis, vistîts e cjalçaduris di lavôr e ocjâi. E je une racuelte emozionante propit pe sô semplicitât e umanitât, e documente tant ben une lavorazion tradizionâl di une piere tant cognossude e doprade intal teritori furlan e no dome.

Ducj i reperts esponûts a son di proprietât privade, metûts a disposizion par lassâ aes gnovis gjenerazions la art antighe de lavorazion de Piere Piasentine, materiâl lavorât ancjemò vuê inte zone e cognossût in dut il mont.