Tor di Zuin, citât esemplâr di fondazion, screade ai 21 di Setembar dal 1938, e da acet intai locâi dal CID (Centri di Informazion e Documentazion) al Museu Teritoriâl de Basse Furlane. In chest mût e ven valorizade une citadute particolâr, nassude in graciis de iniziative privade dal imprenditôr Franco Marinotti, president de S.N.I.A. Viscosa, e sostignude de politiche autarchiche dal regjim fassist: la gnove fabriche e sarès stade in cundizion, di fat, di produsi la celulose necessarie pal bisugn nazionâl, otignude cun procediments inovatîfs metûts a pont intai laboratoris de aziende.
Il progjet de citât fabriche al è stât comissionât al architet Giuseppe De Min (1890-1962) che al à individuât areis funzionâls precisis, distintis in maniere jerarchiche, daûr dal model tipic dai insediaments dal paternalisim industriâl: inte zone centrâl, disponûts dilunc di un as ideâl Est-Ovest, a son i lûcs publics (tant che la Glesie, la scuele e il Municipi) e lis cjasis dai impleâts; a Sud o cjatìn lis cjasis dai operaris disponudis daûr di un scheme ortogonâl e dividudis in dôs tipologjiis, a schirie e in linie. A Nord, tal mieç dal vert, a son lis vilutis dai dirigjents e i spazis dedicâts al sport e al timp libar (cjamps di tenis, pissinis, teatri), ordenadis in maniere significative devant dal grant plaçâl che al mene ae fabriche, dulà che si cjate ancje il CID cu la sô alte tor panoramiche. L'edifici che al ospite il Museu, progjetât intal 1961 dal architet milanês Cesare Pea, al jere pardabon un centri di informazion e documentazion: al tignive dentri une biblioteche specializade tant ricje, si fasevin cunvignis, a jerin preparadis mostris no dome di art ma ancje su la storie dal teritori. Il Museu duncje al recupere la vocazion origjinarie dal CID proponint la storie de citât, dal teritori e des realtâts industriâls che si son dadis la volte dilunc dal timp, daûr di un percors espositîf caraterizât dal ûs di struments multimediâi.
Al è ripartît in nûf sezions là che al che si pues scoltâ ancje il “Poema di Torre Viscosa. Parole in libertà futuriste”, scrit di F. T. Marinetti intal 1938 daûr de comission de S.N.I.A., imparâ la storie des bonifichis che a àn interessât la Basse Furlane tacant de fin dal secul XVII, analizâ lis struturis architetonichis de citât e cun di plui scoltâ lis storiis di vite di chei che, intun mût o in chel altri, a àn leât la lôr esistence ae fabriche.
Al è un toc impuartant dal museu un plastic realizât al principi dal 1960 che al figure l'implant, la darsene, la citât e une des 7 agjenziis che a ripartivin la campagne ator e dulà che e jere coltivade, fin ai agns cincuante dal Nûfcent, la cjane gargane; al è di chest plastic che si osserve cun clarece la razionalitât tal ordin de citât industriâl. Il visitadôr al pues amirâ ancje plastics dai implants de societât tal forest, ceramichis artistichis prodotis a Tor di Zuin dal 1954 ae fin dai agns Otante, il cine documentari che Michelangelo Antonioni al à zirât intai implants di Tor di Zuin intal 1949, “Sette canne, un vestito” e oparis di artiscj contemporanis.
Cun di plui e je une sezion dedicade ai lengaçs creatîfs de contemporaneitât, cun oparis di Maria Luisa Marinotti di Romans, fie viazadore di Franco Marinotti e oparis di Enzo Mare, che, di pueste pal CID, al fâs intal 1962 la “Struture 708”.
Il percors museâl al è inricjît ancje des fotos comissionadis de aziende al studi milanês Crimella e fatis in grande part di Vincenzo Aragozzini tra il 1937 e il 1964, che a documentin la nassite de citât e la trasformazion profonde dal so teritori.
Il Museu, in graciis de sô concezion particolâr al è un organisim dinamic, bon di svariâ i siei contignûts proponint intal timp gnovis sezions là che a vignaran aprofondîts altris aspiets de storie de Basse Furlane. Cumò il Museu al è sierât (Otubar 2010).