Intal 1975 Enrico De Cillia (1910-1993), nassût a Trep, in Cjargne, al à decidût di regalâ al so paîs cincuante oparis di esponents cognossûts dal Nûfcent furlan, al è stât cussì che e je nassude la Galarie. Dute la colezion e à un centenâr di oparis, risultât de gjenerositât, de sensibilitât dimostrade sedi dai artiscj sedi de aministrazion comunâl stesse che, par implementâle, e à acuisît cierts vuelis interessants dal mestri De Cillia.

Ancje il fi dal artist, Giorgio, al à judât a cressi la colezion, donant ciertis oparis di so pari che a permetin di ripassâ cuasi dute la cariere dal artist dal principi intal 1942 ai ultins lavôrs dal 1992. Enrico De Cillia al à scomençât a piturâ intal 1940, dopo vê lavorât par tancj agns tant che decoradôr.

Dute la racuelte e pues jessi ripartide in colezions minôrs: chê plui impuartante e je chê dedicade al paisaç cu lis oparis di Domenico Someda, Antonio Coceani, Marco Davanzo, Marino Sopracasa, Enrico Ursella, a son ancje i paisaçs furlans plui resints di Angelo Variola, Arturo Manzano, Angelo Popesso, Vico Supan e Gianni Borta. Une altre serie impuartante e je costituide di une sucession di naturis muartis, figuris e composizions astratis che a acompagnin il visitadôr viers la storie atuâl de art furlane: in chest percors “Nature muarte” di Sandro Filipputti (1930) al è une tape essenziâl. Dopo a son lis oparis di doi artiscj dal Neorealisim postbelic, Toffolo Anzil e Giuseppe Zigaina, lis gjeometriis plui atuâls di Aldo Colò e Carlo Ciussi, lis scomposizions cromatichis di Marco Marra e Maria Teresa De Zorzi.

Evoluzion artistiche e rispiet de tradizion si conciliin invezit intes creazions di Umberto Martina, Fred Pittino, Giorgio Celiberti.

E je degne di atenzion ancje la sezion grafiche rapresentade di artiscj tant che Giovanni Pellis, Giorgio Marangone, Virgilio Tramontin; a son ancje sculturis, pocjis ma significativis, di Benito Asquini e Luciano Del Zotto, un basrilêf di Dino Basaldella e une maternitât di Enzo Plazzotta.