Intes tombis sot dal paviment dal domo di Sant Andree, a son stâts cjatâts fûr i rescj mumificâts di cualchi notabil, cualchi nobildone e cualchi eclesiastic di Vençon.
I cuarps mumificâts a son stâts cjatâts tacant dal secul XVII: a jerin reperts che a stiçavin tante curiositât e interès e la lôr 'conservazion' e à fat preocupâ daurman, stant che si leve a pericul di pierdiju par simpri par vie de umiditât.
Intal 1845 si à viodût di une esposizion plui “sane” trasferintju intun lûc adat. Li a son restâts fin ai 6 di Mai dal 1976. Des ruvinis de taronde di Sant Michêl, sdrumade pal taramot, dai vincjeun cuarps mumificâts a son vignûts fûr dome cuindis intîrs; i rescj di chei altris a son stâts dâts dongje in cualchi casse e a àn vût il destin di jessi brusâts intal fûc dolôs dal capanon là che a jerin ricoverâts.
Lis cuindis mumiis restadis, dopo il lôr recupar e dopo di un intervent conservatîf di emergjence, a son stadis esponudis in maniere precarie intune rimesse di lamarin.
Si è tant scrit su lis Mumiis di Vençon e cuasi simpri, al è stât metût in risalt il fenomen singolâr de mumificazion, che inte piçule citât di Vençon e à chês carateristichis esclusivis, che no si cjatin in altris localitâts e che a àn fat celebris lis mumiis fint dai prins dal Votcent.
Propit in chest periodi in Europe si fevelave cussì tant des Mumiis, che il stes Napoleon Bonaparte al à volût capî ben di ce che si tratave, lant di persone a Vençon, al jere il 1807. Par ce che al tocje il fenomen de mumificazion, pal moment no si pues verificâ lis causis in maniere direte. In ogni câs, o vin reson di pensâ che une cause fondamentâl che e varès puartât al fenomen de mumificazion e sedi la composizion dal sot tiere. Cumò, cinc des cuindis mumiis, a àn cjatât une colocazion adate e rivuardose inte taronde cimiteriâl di Sant Michêl dal XIII secul, dongje dal domo, che cumò e je restaurade. Chê plui 'famose', e je la mumie dal 1647 di un membri de famee nobile dai Scaligeri vivût a Vençon, che i disin il “gobo”, ancje se cence reson, di fat di pôc si à scuviert che la gobe e je dovude ae posizion dal cuarp dentri de bare e no une malformazion fisiche di cuant che al jere vîf.