Art Park al è in sostance une Mostre permanente di Art Contemporanie tal viert. E je la prove, ben riessude, di instaurâ un dialic vantazôs tra ducj chei che a condividin chescj spazis: progjetiscj, artiscj, aministradôrs, citadins.

Il Museu al è stât ideât e istituît di Egidio Marzona. Lui, dal imprin galarist in Gjermanie e colezionist di art, al è il promotôr di chest straordenari progjet; tornant intal so paîs par cirî lis sôs lidrîs, al à volût fâ nassi cheste iniziative singolâr.

Dal 1989 Egidio Marzona al à promovût tantis realizazions lavorant cun personalitâts di prin nivel tant che Bruce Neuman, Richard Long, Sol LeWitt, Lawrence Weiner, Dan Graham, Bernd Lohaus, Lothar Baumgarten, Mario Merz e Giuseppe Penone e altris artiscj di innomine internazionâl.

Chescj artiscj ispirâts di varis moviments di art dal Minimalisim ae Land Art, de Art Concetuâl ae Art Puare, a son unîts dal desideri di lâ fûr dai confins istituzionâi de regule par puartâ la esperience artistiche intal mont reâl. La ambientazion particolâr che si cjate a Vile di Verzegnis, dulà che no son barieris stant che e je une sorte di continuitât tra paîs e terens vierts, tra areis publichis e privadis, al permet une “vision continue” dulà che lis oparis a interagjissin cul paisaç. Il strenzisi di cheste relazion, in sintonie cul desideri di comunicazion cul paisaç ricercjât dai artiscj, insiemi cu la continuitât spaziâl, al è l'element essenziâl de esperience proponude di Marzona. L'ambient al devente in chest contest une gnove font di ispirazion. La colocazion des oparis singulis no je casuâl, ma e je contestuâl cu la lôr ideazion.

I artiscj, di fat,  lis àn progjetadis dopo jessi restâts a Vile di Verzegnis e dopo di vê studiât cun atenzion la lôr colocazion. No son percors o ponts di viste prefissâts. La impostazion aes oparis singulis e je libare di cualsisei condizionament, fale chel, unic, che si determine ogni volte che il visitadôr si ferme a cjalâ.

Duncje chest al è un sît di art contemporanie là che la creativitât no si conclût cu la realizazion de opare stesse, ma e va indevant e si rinove ogni volte dome pai voi di ogni visitadôr.