Al à aderît ae Rêt Museâl Provinciâl
Il Zardin dai Sempliçs, che al cjape dentri cuasi mil e dusinte plantis pal plui autoctonis, al è un ort botanic tematic nassût intal 1996 ospitât dentri de Polse di Cougnes, Centri Ecumenic di acet, spiritualitât, culture e ambient.
Il zardin al è a pôcs pas de antighe Plef di Sant Pieri a Zui e si slargje suntune serie di roncâi. Il prin al ospite lis plantis alimentârs e chês velenosis; il secont e il tierç lis plantis che si dopravin par tradizion par curâ i disturps dai diviers aparâts e ancje diviersis plantis dopradis par fâ amârs, digjestîfs e licôrs in gjenar. Intal ultin roncâl a son ciertis fameis botanichis che a cjapin dentri speciis difondudis in Cjargne e intal teritori tor ator: Labiatae, Liliaceae, Iridaceae, Amaryllidaceae, Primulaceae, Violaceae, Globulariaceae, Campanulaceae, Gentianaceae, Boraginaceae, Scrophulariaceae e Compositae, e ancje une buine part des plantis tuteladis de leç regjonâl 9 dal 2007. L’ultin roncâl, in bande di un troi segnât intal prât, al da dongje i Felets. Ogni specie floristiche dal ort e à un cartelin cul non sientific de plante e cu lis traduzions par furlan, talian, todesc e sloven. I cartelins des plantis alimentârs a ripuartin simbui che a segnin se a son plantis buinis e di larc consum o plantis comestibilis di pôc consum (parcè che pôc cognossudis o parcè che dissavidis o cuntun gust masse fuart), o plantis che il lôr ûs alimentâr al è tant scjars o aromai bandonât o fintremai che si pense che a puedin jessi tossichis.
Al ort botanic i fâs di dipendence un locâl assegnât a laboratori, ben furnît par esercitazions didatichis destinadis a students e visitadôrs, cuntune buine dotazion di aparâts e materiâl, cuntun erbari e une colezion di droghis vegjetâls; si puedin fâ dimostrazions pratichis su la racuelte, la conservazion e l'implei des plantis medisinâls (polvars, infusions, decots, tinturis, tinturis maris, soluzions in vueli e alcul), e ancje esercitazions di anatomie vegjetâl (esam microscopic di lidrîs, fueis, rosis e semencis). Il Zardin dai Sempliçs al è sede di ativitât didatiche pai students de Facoltât di Farmacie de Universitât di Triest e de Facoltât di Agrarie de Universitât dal Friûl.
Dentri dal Centri Polse di Cougnes, che al ospite il Zardin dai Sempliçs, e je une biblioteche ecumeniche straordenarie, cun cuasi trê mil volums che a rivuardin lis tematichis plui svariadis dal cognossibil uman: de storie ae art, de filosofie ae poesie, de teologjie ae leterature.
Tal centri al è ancje un osservatori astronomic, la scuele di art de cjampane dulà che si pues imparâ a scampanotâ a man, une scuele di iconis dulà che si impare cheste art figurative antighe e soredut un lûc di “polse” pe riflession personâl, pe ricercje di Diu, par esperiencis mistichis. In bande di une capele ecumeniche e de tant antighe Plef di Zui, al è un stali, furnît cemût che si dêf, pal ritîr di cui che al volès une solitudin totâl.